Photo courtesy of DSWD 6
BACOLOD CITY (PIA) — Katuyuan sang Department of Social Welfare and Development (DSWD) nga maghamtang sang kapin 100,000 ka mga family food packs (FFPs) sa iya sini field offices sa Western kag Central Visayas bangod sa nagapadayon nga aktibidad sang Bulkan Kanlaon.
Ginsiguro ni DSWD Sec. Rex Gatchalian kanday DSWD Regional Office 6 Director Arwin Razo kag Regional Office 7 Director Shalaine Lucero nga ila mabaton ang dugang nga bulig gikan sa Central Office.
Hambal ni Gatchalian, dedikado ang ahensya paagi sa iya sini Disaster Response Management Group (DRMG)-National Logistics Management Bureau (NRLMB) nga mapalab-ot ang dugang nga food packs para sa isla sang Negros.
“We will massively send FFP stockpiles to Negros Oriental (Region 7) and Negros Occidental (Region 6). We will fill our provincial warehouses on the island to the brim,” hambal ni Gatchalian.
(Magapadala kita sang madamo nga FFPs sa Negros Oriental (Region 7) kag Negros Occidental (Region 6). Butaon naton ang provincial warehouses sang Isla sang Negros.)
Sa bahin sang DSWD Field Office 6, ginhambal ni Director Razo nga may yara sila sang ginarentahan nga warehouse sa Bacolod City nga sarang butangan sang kapin 50,000 ka karton sang food packs.
Sila nagapangita man sang iban pa nga warehouses nga pwede magamit sa ulihi para sa iban pa nga bulig nga ila matipon para sa internally displaced individuals (IDPs).
Sang Enero 18, yara na sa Bacolod City warehouse kag iban pa nga prepositioning sites ang kapin 50,000 ka FFPs para masiguro nga madasig kag tayuyon ang pagpanagtag sang bulig sa mga apektado nga pamilya sa tion sang imerhensya.
Nagapakig-angot man ang DSWD sa mga lokal nga panguluhan para masiguro nga may nagakaangay nga espasyo nga butangan sang FFPs kag iban pa nga bulig nga ila mabaton.
Pagpaathag man ni Sec. Gatchalian nga ang 100,000 nga FFPs ang dugang lang gid sa food packs nga nakapondo na nga daan sa ila regional offices.
“Check the maximum capacity for both sides of Kanlaon. I want maximum capacity the warehouses of Negros Oriental and Occidental. So we have to be ready,” dugang niya pa. (AGP/BPS/PIA Negros Occidental/DSWD)
