Ang representante kang Hamtic multi-purpose cooperative nagbaton kang pagkilala bilang “partner cooperative kang DSWD” sa San Jose, Antique. (PIA Antique)
SAN JOSE, Antique (PIA) — Ang Department of Social Welfare and Development nagpirma kasan-o gid lamang kang sangka kasugtanan ukon Memorandum of Agreement (MOA) sa 12 ka mga Multi-Purpose Cooperatives (MPC) sa Antique.
Nagalaum ang DSWD nga sa amo nga kasugtanan mapasanyog pa gid ang anda pagserbisyo sa mga katawhan nga myembro man kang kooperatiba.
Paagi sa amo nga MOA, ginatuyo kang DSWD nga mataw-an man ka husto nga paghanas tuhoy sa pagdumara kang pondo ukon “financial literacy” ang mga benepisyaryo kang anda program.
Si Pantawid Pamilya Provincial Link Jeffrey Gabucay naghambal nga ang dya nga partnership naumpisahan run kang naglinigad pa nga tinuig paagi sa mga programa kang 4Ps.
Ginhambal ni Gabucay nga ang mga MPCs nangin katimbang run kang DSWD sa paghiwat kang Family Development Sessions tuhoy sa Financial Literacy.
Ang dya nga kooperatiba ginakatapuan kang Barbaza MPC, Belison MPC, Bugasong MPC, Dao MPC, Hamtic MPC, Libertad MPC, Magdalena MPC, Pandan MPC, Patnongon MPC, San Jose MPC, Valderrama MPC kag Casay Credit Coop.
Si Susie Nermal, chairperson kang Belison Multi-purpose Cooperative, nagdayaw sa dya nag lihuk kang DSWD agud mataw-an kang husto nga serbisyo ang anda myembro kag benepisyaryo man kang mga programa kang gobyerno.
May kabilogan nga 4,630 ka mga 4Ps nga benepisyaryo nga myembro man kang kooperatiba sa probinsya, hambal ni Gabucay.
Suno kay DSWD 4Ps division chief Belen P. Gebusion, ang dya nga lihuk nagatuyo sa pagpsanyog pa gid kang mga panimalay para mabuligan sanda nga mangin “self-sufficient.” (AGP/PSM/DSWD/PIA-Antique)
