Mga benepisyaryo kang proyekto kang DSWD-SLP nagbaton kang tseke para sa anda proyekto. (Photo: PIA Antique)
SAN JOSE, Antique (PIA) — Ang Department of Social Welfare and Development nagtao ka tseke sa apat ka organisasyon nga benepisyaryo kang Sustainable Livelihood Program (SLP) sa Antique.
Dya ginhiwat bilang kabahin kang selebrasyon kang kaadlawan ni Presidente Ferdinand R. Marcos, Jr. sa sangka programa sa Evelio B. Javier Gymnasium, Binirayan Sports Complex, San Jose de Buenavista.
Nagpasalamat kang bahol si Governor Rhodora J. Cadiao sa dyang lihuk ka Presidente nga mabuligan ang mga kubos nga Antiqueño.
“Amo ra nga ginbuol namun kamo halin sa norte bisan pa nga mauranun ang panahon, para maka-agum man kamo ka ayuda kang aton Presidente. Dya ang panahon nga gusto ko gid maka-abot kaninyo ang ayuda kang national government,” hambal ni Cadiao.
Suno sa DSWD SLP Provincial Coordinator Noli Valenzuela, dyang apat ka organisasyon may eksperyensa run sa pagpadumara kang proyekto.
Sa banwa kang Sibalom, darwa ang organisasyon nga may 60 tanan ka miyembro ang nakabaton kang P1.2 milyon nga kantidad kang proyekto para sa anda Rice and Feeds Retailing Project sa barangay Panlagangan kag Tigbalua.
Sa Hamtic naman, ang Angat SLP organization halin sa Barangay Funda, nga nakabaton kang P480,000 para sa 24 ka miyembro nga may Community Store Project.
Kag ang MaySan SLP Association, isa ka fisherfolk organization, nakabaton man kang P540,000 para sa anda fishing supply store project.
Ginalauman ka DSWD nga gamiton kang husto kang mga benepisyaryo ang pondo para mapabahol pa gid nanda ang kita kang anda organisasyon. (AGP/PSM/PIA Antique)
