Si Marian D. Sabaria kang DSWD-4Ps Office Antique naghambal sa programa kang PIA Antique nga Pagpa-athag sa Radyo Natin San Jose. (Photo: PIA Antique)
SAN JOSE, Antique (PIA) — Nagpaambit kang pira ka tikang para matapna ang pagpamintas sa mga kakababaihan kag kabataan ang Department of Social Welfare and Development- Pantawid Pamilyang Pilipino Program (4Ps).
Dya may kaangtanan sa ginapatuman nga 18-day Campaign to End Violence Against Women ukon END VAW Campaign.
Suno kay Marian D. Sabaria kang DSWD-4Ps Office Antique, kang tana naghambal sa programa kang PIA sa Radyo natin San Jose, dapat gid nga tapna-un ang mga pagpang-abuso sa mga kababaihan lakip ron ang mga kabataan tungod dya may bahul nga epekto sa aton komunidad kag pamilya.
Gintugruan importansya ni Sabaria nga ang edukasyon kag ang pagpabakod kang ekonomiya kang kababaihan, makabulig nga malikawan nga mangin biktima kang VAWC.
Ang Family Development Sessions (FDS) nga anda ginatugro sa mga pamilya nga benepisyaryo kang 4Ps nakatugro kang bahol nga pag-intindi kag kabakod sa mga kababaihan kag pamilya nga pamatukan ang pagpang-abuso.
Ginpahayag ni Sabaria, “Sa pira ka mga komunidad, ang mga cultural norms nagasikway sa pagreport kang mga insidente kang pagpang-abuso kag ang pagpamintas sa sulod kang panimalay ginakabig nga normal lamang. Gani nagapadayon ang mga kaso kang pagmaltrato ukon pagpamintas sa mga kababaihan.
Suno kay Sabaria, dya dapat untatun run kag taw-an ka tion ang mga kababahan nga magpa-utwas kang andang kinamatarong.
Ang mga ginikanan ginapangabay kang DSWD nga magpanguna sa pagpakita kang pagpalangga sa pamilya ilabi na sa asawa kag mga kabataan. (AGP/PSM-PIA Antique with reports from MPO/GIP)
