TAGBILARAN CITY, Bohol (PIA) — Miawhag ang Department of Social Welfare and Development (DSWD) sa mga household-beneficiaries sa Pantawid Pamilyang Pilipino Program (4Ps) sa pagkuha og insurance coverage ug mahimong umaabot nga mga pensioner pinaagi sa state-run Social Security System (SSS).
Kini nga inisyatiba kabahin sa pasalig sa DSWD sa pagsiguro sa pinansyal nga seguridad ug pagpadayon sa mga benepisyaryo sa 4Ps samtang sila mobalhin gikan sa programa, matud pa ni 4Ps Program Information Officer Kerwin Macopia atol sa gipahigayong Information Officer’s Conference sa lalawigan sa Bohol niadtong Hunyo 18.
“Gusto nato nga ang atong mga benepisyaryo sa 4Ps adunay lig-ong tinubdan sa kita, pinaagi man sa self-employment o pormal nga trabaho,” matud pa ni Macopia ngadto sa mga sakop sa Association of United Development Information Officers (AUDIO) Bohol.
Giingong ang DSWD ug ang SSS nagsusi usab sa mga posibilidad sa paghatag og subsidyo sa panahon sa kalamidad o wala damhang mga hagit aron maseguro ang padayon nga coverage sa mga benepisyaryo.
Ang 4Ps, nga gi-implementar sa DSWD, usa ka nasudnong estratehiya sa pagpakunhod sa kakabos nga gi-institutionalize ubos sa Republic Act No. 11310 o “An Act Institutionalizing Pantawid Pamilyang Pilipino Program (4Ps)” nga gilagdaan niadtong Abril 17, 2019.
Ang punoan nga programa sa DSWD nagbutang sa usa ka premium sa paghatag sa mga kabus nga pamilya sa paagi sa pagbulag gikan sa intergenerational cycle sa kakabus pinaagi sa human capital investments. (ECB/PIA7-Bohol)
