TAGBILARAN CITY, Bohol (PIA) — Subli nga mipahinumdom ang Department of Social Welfare and Development (DSWD) sa mga business establishment sa paghatag sa mga diskwento ug uban pang statutory privileges alang sa mga persons with disabilities nga gimando sa Republic Act (RA) 10754 o ang Act Expanding the Benefits and Privileges of Persons with Disability.
Gibutyag ni Assistant Secretary for International Affairs ug ang Attached and Supervised Agencies (IAASA) Elaine Fallarcuna sa usa ka Media Forum niadtong Hulyo 4 nga adunay nay mga nakasohan nga mga establisemento sa negosyo nga nagdumili sa pagsubay sa balaod nga giatubang sa departamento, pinaagi sa gilakip nga ahensya niini, ang National Council on Disability Affairs (NCDA).
Matud pa gani bag-o nga mga pagdungog nga gihimo tungod sa wala pagsunod sa balaod sa usa ka organisasyon o negosyo.
Ang opisyal sa DSWD nipasidaan: “Meron po sa batas na kapag may mga non-compliance, indicated naman po doon yung mga penalties na pwede na kaharapin kapag hindi sila nag-comply, specifically the 20 percent discount for persons with disability na on-top pa po ito sa VAT-exempt .”
Ang mahinungdanong bahin sa balaod naglakip sa 20 porsyento nga diskwento ug exemption sa Value Added Tax (VAT) sa pagpalit sa pipila ka mga butang ug serbisyo; pag-usab sa mga katungod sa mga tawo nga adunay kakulangan nga maka-avail sa social insurance; tabang sa edukasyon; espesyal nga diskwento sa pagpalit sa mga batakang panginahanglanon ug pangunang palaliton; ug express lanes sa tanang commercial ug government establishments.
Ang mga makalapas sa balaod mahimong mag-atubang og multa gikan sa P50,000 ngadto sa P200,000 o pagkabilanggo sa unom ka bulan hangtod sa unom ka tuig.
Sa pagkadawat sa balido nga reklamo ug pagsunod sa angay nga pahibalo ug pagdungog, ang tukma nga awtoridad mahimo usab nga bawion ang business permit, prangkisa, o susamang mga pribilehiyo sa bisan unsang entidad nga nakalapas sa balaod.
Ang mga PWDs o bisan kinsang concerned citizen mahimo usab nga mopasaka og reklamo ngadto sa Persons with Disability Affairs Office (PDAO) sa lokal nga kagamhanan nga adunay hurisdiksyon sa establisemento o sa pinuy-anan sa reklamante. (ECB/PIA7-Bohol)
