DTI-Aklan ginaengganyo ro mga Akeanon nga mangin DTI x Google scholars

KALIBO, Aklan (PIA) — Ginaenganyo it Department of Trade and Industry iya ro mga Akeanong negosyante nga gustong i-digitalize ro andang negosyo ag mga indibidwal nga pursigido nga magpaidaeum sa training nga mag-intra sa DTI x Google Career Certification Program 2024.

Suno kay DTI-Aklan Information Officer Dessa Anh Flores, ro DTI x Google Career Certification Program 2024 hay libre nga online training course nga ginatao it DTI kapartner ro Google Philippines.

Si DTI-Aklan Provincial Director Romel L. Amihan ginpaathag sa mga katapo it medya sa Aklan ro mga programa ag aktibidadis it Department of Trade and Industry – Aklan sa harang dag-on. Sambilog kara hay ro DTI x Google Career Certification Program 2024, nga isaea ka libre nga online training courses para sa an-om ka aspeto, raya ro: Data Analytics, User Experience (UX) Design, Project Management, IT Support/IT Automation, Digital Marketing & E-commerce, ag Cybersecurity. (PIA-Aklan)

“Raya hay isaea ka career scholarship certification program kung siin ro mga madinaeag-on nga mga aplikante hay pagataw-an it libreng lisensya para ma-acces ro mga kurso ag paga sertipikahan sa an-um nga mga aspeto, daya hay sa : Data Analytic, User Experience (UX) Design, Project Management, IT Support/IT Automation, Digital Marketing and E-commerce, ag Cybersecurity,” eksplikar ni Flores.

Dugang pa nana nga ro mga kursong ginaha-ead hay self-paced arrangement nga bu-ot hambaeon nga ro minugtuon hay pwede makatuon bisan siin ag bisan anumang oras, basta matapos nanda ro bilog nga module mismo ukon bago mag Disyembre 31, 2024. Ro mga kurso nagabuhay haoes halin tatlo hasta an-om buean para matapos ukon haeos 120 oras sa kada 10 oras kada dominggo.

“Ro probinsya it Aklan ag Guimaras hay may 500 slots ag hara nga Hulyo 22, 2024 may-una pa nga 50 nga bakante. Amon gid ginahikayat ro mga Akeanon nga panipuslan rayang oportunidad samtang raya hay libre sa baeayran ag sanda makabuoe it competitive credential halin sa Google,” hambae ni Flores ag gindugang nana nga pwede magparehistro sa nagkaea-in ea-in nga certification courses.

Ro programa hay bukas sa tanan nga mga pumueoyong Filipino, nagedad 18 pataas ag komitado nga matapos ro kurso sa sueod it takataeanang oras. Kinahang-ean man nga ro mga interesadong aplikante hay nagapanag-iya it gadget ag may access sa internet.

“Amon man gina-enganyo mag intra ro mga tag-iya it micro small and mediium entrerprises (MSMEs) nga nagahandum it digitalization sa andang mga negosyo ukon sa andang mga empleyado, dahil eagko ro maikabulig kara sa andang mga negosyo; ag syempre ro mga kababaein-an, out-of school youth, person with disability, senior citizen, mga owa it trabaho o under-employed,” hambae ni Flores.

Sa mga interesadong aplikante hay gina-abisuhan gid nga magparehistro sa: https://bit.ly/2024GCC-InterestForm. (AAL/SQP/PIA-Aklan)

In other News
Skip to content