SYUDAD SANG ILOILO (PIA) – Ginhatagan sang pagpasidungog ang Iloilo City bilang “Overall Most Competitive” sa highly urbanized cities (HUCs) sa rehiyon, samtang ang Guimaras ang ginkilala bilang “Most Competitive Province” sa ginhiwat nga Creativity Forum kag Competitive Local Government Unit (LGU) Awards.
Ang kahiwatan gin-organisar sang Department of Trade and Industry (DTI)-6 sang Nobyembre 4, 2024 sa diin ang mga pagkilala ginhatag sa local government units (LGUs) nga nagpakigbahin sa Cities and Municipalities Competitiveness Index (CMCI) survey nga nagarepaso sang performance sang LGUs sa pila ka “key competitiveness pillars.”
Ang 133 ka mga LGU nga nagpasakop sa kahiwatan gintunga base sa mga kategorya sang munisipyo kag syudad, kag gin-ebalwar base sa ila mga marka sa lima ka competitive pillars nga amo ang Economic Dynamism, Government Efficiency, Infrastructure, Resiliency, kag Innovation.
Ginpahayag naman ni Iloilo City Mayor Jerry P. Treñas nga ang pagkilala nagaserbe nga pamatuod sang panikusog sang syudad sa maayo nga pagdumalahan kag pagka-epektibo sang Public-Private Partnerships (PPP), kung sa diin ini nagapakita sang pagbinuligay sang city government, sang mga lideres sini, kag mga kaupod sa pribado nga sektor sa paghimo sang isa ka dinamiko, tayuyon, kag inklusibo nga siudad.
“We have achieved so much since we worked together as one team. The awards show that the city government is performing well, which is why we are receiving these honors. They inspire us to continue striving for excellence in governance and service,” pahayag ni Treñas sa isa ka Facebook post.
Ginhatagan naman pagtamod sang probinsya sang Guimaras ang pagkilala nga ginhatag sa ila bangud ini nagapakita sang manami nga epekto sang mga programa sang gobyerno probinsyal kag LGUs padulong sa padayon nga pag-uswag sang probinsya.
Samtang, gin-engganyo ni DTI-6 Director Nufable ang LGUs nga gamiton ang kadalag-an nga ila nabaton para mas magbinuligay pa gid agud maposisyon ang komunidad bilang nagauswag nga mga sentro sang pamuhunan.
“Today, we celebrate the outstanding achievements and relentless dedication of the 133 local government units from across Western Visayas who participated in this year’s CMCI cycle. Your commitment to progress and innovation has been instrumental in bringing recognition to our region,” siling ni Nofable. (AAL/JNH/PIA Iloilo)
