Mga lokal nga mamahayag nagtambong kang “Hinun-anon” nga ginpatigayon kang DTI Antique. (Laragway: PIA Antique)
SAN JOSE, Antique (PIA) — Gintumod kang Department of Trade and Industry (DTI) ang mga prayoridad nga sektor para sa pag-uswag kang industriya sa probinsya kang Antique.
Suno kay DTI Provincial Director Mutya Eusores sa ginhiwat nga media conference ukon “Hinun-anon,” ang mga prayoridad nga sektor sa Antique amo ang mga processed food, mani, kawayan, kape, kakaw, kalamay nga muscovado, kag mga produkto nga halin sa niyog.
Kalakip man ang mga produkto nga himo sa lokal nga tela nga “Patadyong.”
Prayoridad man ang produkto nga asin tungod kilala ang probinsya sa tradisyonal nga pamaagi kang paghimo ka dya nga ginabulad lamang sa adlaw.
Ginreport man ka DTI ang mga Shared Service Facilities para sa asin sa mga banwa kang Belison, Patnongon, Bugasong, kag Laua-an.
Sa amo man nga okasyon ginreport kang DTI ang anda mga inisyatibo para suportahan ang mga magagmay nga negosyante kag mga lihuk para maprotektahan ang mga kinamatarong kang konsumidor.
Suno kay Senior Trade-Industry Development Specialist Arnel Oliveros, ginapatuman gid kang anda ahensya ang “Fair Trade Laws” para sa husto kag matarong nga pagnegosyo.
Anda man regular nga ginamonitor kag gina-inspeksyon sa mga establisyemento agud masiguro nga nagasunod sa “standard” ang mga produkto. (AGP/PSM/PIA-Antique kaupod ang mga balita halin kay Yumi Amedo/GIP)
