Padayon nga ginamonitor kang DTI ang presyo kang mga barakalon para sa Noche Buena sa mga tindahan ridya sa San Jose. (Laragway: DTI Antique)
SAN JOSE, Antique (PIA) — Ang Department of Trade and Industry (DTI) Antique nagpangabay sa publiko nga gamiton ang 2024 Noche Buena Price Guide para magiyahan sanda sa mga presyo sa anda pagpamakal sa maabot nga Paskwa kag Bag-ong Tuig.
Ginpanugyan ni DTI Antique Provincial Director Mutya Eusores nga anda ginatugruan ka importansya ang kinamatarong kang mga konsumidor paagi sa pagdesignar kang Noche Buena price guide, nga tuyo matugruan ka kaaram sa pagpili kag pagkumparar kang presyo ang mga konsumidor.
Ang price guide ginpagwa katong Nobyembre 15, 2024 kag epektibo tubtob Disyembre 31.
Ginpasiguro ka DTI nga bastante ang karakuon kang mga Noche Buena goods sa Antique kag ang mga presyo sa tindahan nagasunod sa suggested retail price.
Nag-umpisa man ang DTI sa pagmonitor kang mga Noche Buena items kang Oktubre agud makabuol kang husto nga baseline data.
Nagpanugyan si Eusores sa mga konsumidor nga magplano kang temprano nga pagpamakal, magkumparar kang presyo, usisaon ang expiration dates, kag magbakal lamang sa kilala kag masarigan nga mga establisyemento.
Ana man ginpaandaman ang tanan nga magreport sa mga overpriced nga produkto pinaagi sa pagkilala kang brand, presyo, kag pagpasa ka report sa DTI para ma-imbestigahan.(AGP/PSP/ PIA Antique)
