ILIGAN CITY (PIA) — Gilauman nga makabaton na og kuryente ang mga residente sa mga hilit nga barangay sa Kalilangan ug Panoroganan sulod sa duha hangtod tulo ka bulan, human sa daghang tuig nga walay suga.
Nagpasalamat ang mga residente atol sa usa ka community forum sa Barangay Kalilangan gymnasium diin gipahibalo ang nagpadayon nga paningkamot aron mataud ang kuryente sa ilang mga panimalay.
“Kami sa Barangay Kalilangan dako kaayo among pasalamat sa ILPI. Hinaot unta as soon as possible makasuga gyud mi kay sa barangay daghan kaayo’g panginahanglanon,” matud ni Barangay Kagawad Khalil Macausor.
Subay sa community forum, nahatagan og higayon ang mga residente aron mangutana bahin sa proseso sa aplikasyon ug gipahimangno-an sila kabahin sa safety sa kuryente.
Ang Iligan Light and Power, Inc. (ILPI), ang distributor sa kuryente sa siyudad, maoy nag-organisar sa maong kalihokan isip kabahin sa pagpalapad sa ilang serbisyo.
Matud ni Engineer Danilo Bagtasos, ILPI Vice President for Operations, ang Kalilangan ug Panoroganan and mga katapusan nga mahatagan ug kompleto nga suplay sa kuryente tungod sa landslide nga nakadaut sa mga dalan ug linya sa kuryente.
Human mahuman ang pag-ayo sa mga dalan, gisugdan na ang pagproseso sa mga aplikasyon. Aduna pay mga 35 ka aplikasyon nga nagpaabot tungod sa expired nga permit apan nagtrabaho ang ILPI kauban ang City Engineer’s Office aron masulbad kini.
“Hopefully, it is just matter of application, i-comply ang requirements, permit kay mao mana ang importante, these are things nga kailangan nato trabaho-on kay requirement man. Gamay nalang gyud ni nga trabaho. It’s just a matter of cooperation, mag-coordinate lang ang ILPI with the CEO,” matod ni Bagtasos.
Gipahimangno-an usab ni Bagtasos ang mga residente nga hatagan og prayoridad ang kaluwasan sa kuryente ug i-report dayon ang mga ma-damage nga linya o mga babag.
“Ang atong kuryente kinahanglan nato pod bantayan. I-take care kung naa’y notice nga obstruction sa linya, i-report dayon sa ILPI. Kung naa’y linya nga natagak, ayaw duoli, i-report na sa ILPI, kay kami na bahala murestore ana. I-cordon off ninyo ang area nga walay maka-duol,” dugang pa niya.
Giseguro ni Bagtasos nga ang ILPI magpadayon sa pagpanalipod sa mga linya sa kuryente ug suporta sa mga komunidad aron maka-access sa elektrisidad. (LELA/PIA-10/Lanao del Norte)
