Photo by PIA Capiz Infocen
ROXAS CITY, Capiz — Nagsaka ang ekonomiya sang probinsya sang Capiz sang 6.8 porsyento ukon P79.47 bilyon sa Gross Domestic Product (GDP) sang tuig 2023, mas mataas kung ikumpara sa P74.38 bilyon sang 2022.
Suno kay Rosiebelle Beluso, OIC Senior Statistics Specialist sang Philippine Statistics Authority (PSA), sa gintigayon nga Product Accounts Dissemination Forum, ang nagapanguna nga rason sang pagtaas amo ang wholesale kag retail trade nga may 6.8 percentage points, repair sang mga salakyan kag motorsiklo nga may 1.85 ka percentage points, transportasyon kag storage nga may 1.10 percentage points, kag manufacturing nga may 0.73 percentage points.
Ginpahayag man sang PSA nga may tatlo ka aspeto nga ginabasehan sa GDP- production, expenditure, kag income.
Gindugang pa sang ahensya nga ang pagsaka sang GDP nagakahulugan sang pagdaku sang ekonomiya sa produksyon sang nagkalainlain nga industriya sang probinsya.
Samtang, suno kay Wilar De los Santos, Provincial Planning and Development Coordinator sang lokal nga pangulohan sang Capiz, bisan pa nga AFF ang may pinakamadamo nga kontribusyon sa pagpasaka sang ekonomiya, naapektuhan gihapon ini bangod sa pagtaas sang presyo sang mga farm inputs kag abono.
Dugang sini, gina-agda man sang gobyerno probinsyal ang mga Capiznon nga mag-upod sa community approach agud makabulig sa pag-umwad kag ma solusyunan na ang ini nga madugay-dugay na nga problema.
Sa piyak nga bahin, nag-implementar ang Capiz provincial government sang programa nga “Kalubihan sa Kamaisan” bilang malawig nga solusyon sa mangunguma para buligan kag mabuhinan ang epekto sang pagbaha nga nagapapigado sa produksyon sang AFF industry sang probinsya. (AGP/PLF/PIA Capiz)
