October 23, 2023- Sa tumong nga mapalapdan pa ang kahibalo sa mga “Emergency Responders” ning dakbayan, ang kagamhanang lokal sa Dipolog pinaagi Department of Health (DOH) R-IX, City Health Office (CHO), Corazon C. Aquino Hospital (CCAH) ug City Disaster Risk Reduction and Management Office (CDRRMO), ang mipahigayon sa 5 kaadlaw nga pagbansay-bansay sa “Basic Life Support (BLS) and Cardio Pulmonary Resuscitation (CPR) Training of Trainors” sugod karong adlawa, Oktubre 23 hangtod 27 ning tuiga.
Kini ang gitambongan sa mga personahe gikan sa mga ahensiya ug buhatan sa CDRRMO, CCAH, PNP ug DepEd, diin ang mga nahisgutan ang mopa-ilawom sa nagkalain-laing mga lectures nga dunay kalabutan sa BLS ug CPR.
Malipayon nga gipadangat ni Mayor Darel Dexter T. Uy ang iyang kalipay kinsa mihatag sa iyang inspirational message atol sa pagbukas sa kalihukan, tungod kay ang matun-an sa mga “Emergency Responders” ang dako kaayo og ikatabang sa katawhan ilabina sa panahon sa mga kalamidad. Samtang mapasalamaton usab si CDRRM Officer Atty. Arvin L. Bonbon sa gipahigayong aktibidad tungod kay kining mga trainors nga gibansay-bansay mao na pod unya ang mopahigayon og mga skills training ngadto sa lokal nga lebel sama sa mga tulonghaan, mga panimalay ingon man sa mga kabarangayan.
Nasayran nga ang mga lecturers ang nagagikan sa DOH-IX nga naglangkob nila ni Mr. Maxel G. Bermas, RN, Mr. Charlou Peligro, Dr. Rizalino Pajarito, Mr. James Arden Fernandez, RN, ug Mr. Rommel A. Roz, RN. (cio-Ltd)
