SYUDAD SANG ILOILO (PIA) — Nagkalain-lain nga mga Technology Business Incubators (TBIs) nagikan sa mga unibersidad sa rehiyon ang nagpakigbahin sa Energy Incubation Program Training nga ginpatigayon sang New Energy Nexus (NEX) Philippines kaupod ang UMWAD Consortium, Department of Science and Technology (DOST6), kag Innovate Iloilo.
Luyag sang ini nga hilikuton nga magpatubo sang tayuyon kag mainuswagon nga palibot para sa mga energy entrepreneurs. Kabahin man sini ang paghatag sang nagakaigo nga ihibalo kag kinahanglanon agud nga makasuporta man ini sa mga energy startup companies.
Para kay ISATU president Dr. Gabriel Salistre, iya ginpahayag ang suporta nga ginahatag sang unibersidad sa bahin sang pagpanalawsaw kag inobasyon, kapin pa ini ang nagahatag solusyon sa mga ginapangatubang nga mga pagpanghangkat.
“In the past years, we have worked hard to build and support start-ups and we did this through our various activities. We are guided and we mentored them to grow and develop their full potential. We have also helped them work on their own innovations and some of them are helping individuals and communities,” suno kayu Salistre.
Nalakip sa mga gindiskusyunan nga topiko amo ang development sang pipeline-building strategies, pagtuga sang incubation program plan naangot sa sektor sang enerhiya, kag paghimo sang Monitoring, Evaluation, and Learning (MEL) plans.
Kabahin man sa ginhiwat nga aktibidad ang paglagda sang isa ka Memorandum of Understanding sang DOST 6, ISAT-U, UMWAD, kag NEX Philippines sa katuyuan nga mapalig-on kag mahatagan suporta ang mga TBIs sa bahin sang sektor sang enerhiya sa rehiyon.
Dugang pa, ang ini nga partnership mangin pamaagi agud madihon ang mga TBIs pinaagi sa panalawsaw, trainings, kag iban pa nga mga hilikuton.
Sa pihak nga bahin, ang NEX Philippines isa ka global non-profit organization nga nagasuporta man sa mga clean energy entrepreneurs humalin sang 2004.
“Our network spans over 100 incubators and accelerators across 30 countries, fostering a cleaner, more sustainable energy future,” sambit sang NEX Philippines. (AAL/LMLE/PIA Iloilo)
