TAGBILARAN CITY, Bohol (PIA) — Sa reklamo sa mga taga Bohol nga gipang-ilogan nag trabaho sa mga langyaw nga naglihok sa mga industriya, o sa kahingawa nga masudlan ang Bohol sa Philippine Offshore Gaming Operations (POGO) operations, gipagawas ni Gobernador Erico Aristotle Aumentado ang us aka Order Ehekutibo nga nagmugna sa usa ka task force alang niini.
Pinaagi sa Executive Order No. 43, series of 2024, namugna na ang bahan nga maoy magtapok sa mga intelligence reports, reklamo ug mga kasayuran nga magamit niini kalabut sa mga negosyo ug negosyante nga nagpadagan og negosyo, apan diay gihimo ra nga front alang sa illegal nga mga kalihukan.
Ang EO 43, o ilhon nga Safe Workplace Environment ug Anti-illegal Business Task Force, magtuki sa mga taho, kasayuran ug mga reklamo ilabi na sa mga negosyo nga diay, gihimong agi-anan alang sa human trafficking, pugos nga pagpatrabaho sa sobra sa oras, prostitusyon, pagpang-abuso sa mga trabahante, ang illegal nga pagpatrabaho sa mga langyaw, illegal nga pagpadagan sa negosyo nga walay mga papeles, ug ang pagpanikas batok sa mga Pilipino.
Gipangunahan mismo sa gobernador, ang task force apilan sa Provincial Peace and Order Council (PPOC) Executive Assistant for public safety, police provincial director, PNP provincial Intelligence Unit chief, National Bureau of Investigation Bohol head, CIDG Bohol, PDEA, DILG Provincial Director, Provincial Fire Marshal, DOLE head, Bureau of Immigration Alien Control Officer, DOT regional director, OPSWD, BTO, IACAT, LGU, COPs, Business licensing officers ug mga local nga opisyales.
Ilang misyon mao ang pagtapok ug pagpanguhang intelligence reports kabahin sa mga establisemento nga nagnegosyo apan diay gigamit usab sa illegal nga mga panapi, pagluwas sa mga biktima sa human trafficking, illegal nga pagpatrabaho sa us aka trabahante, pagpatrabaho sa trabahoan nga dili luwas, ug magpakatap usab sila sa mga pagtudlo alang sa luwas nga trabahoan, ug magpugong sa pagsulod dinhi sa Bohol sa mga illegal nga kalihukan, ilabi na sa negosyo. (RAHC/PIA7 Bohol)
