SYUDAD SANG ILOILO (PIA) — Isa ka junior high school nga estudyante nagikan sa Mandurriao National High School ang nagdaug sa nahauna nga “Paindis-indis sa Pagsaysay sang Sugilanon” nga gin-organisar sang Sumakwelan Iloilo, Inc. para sa ika-87 nga Charter Day sang syudad sang Iloilo.
Ginlutos ni Arvayne Jed Endonila ang 13 ka mga pumalasakop humalin sa nagkalainlain nga mga pampubliko kag pribado nga buluthuan sa syudad sa tion sang paindis-indis nga ginhiwat sa kolaborasyon sang Office of the City Population Officer sadtong Agosto 21, 2024 sa Diamond Jubilee Hall diri.
Nakuha naman ni Majesty Jade Q. Briones sang Lapaz National High School ang ikaduha nga lugar kag Shamiah Aisle P. Catolin sang Iloilo City National High School ang ikatatlo nga lugar.
Ginpahayag ni tagpangulo sang paindis-indis kag Population Program Officer II Pearl Parangan nga ang aktibidad ginapamunuan sang ila organisasyon una agud mapalapnag ang pagpalangga sa tumandok nga pulong, ilabi na sa mga ulihing tubo, agud mabuligan sila nga maayo mahangpan kag makilala ang lokal nga kultura kag values.
Suno pa sa iya ila naobserbahan nga ang mga lamharaon nga henerasyon mas ginapasulabi sa karon ang paggamit sang English ukon Tagalog sang sa Hiligaynon, lokal nga pulong nga ginagamit sa bahin sang isla sang Panay.
“Ini nga paindis-indis kabahin sang amon pagpaninguha nga mapalangga kag aktibo nga gamiton ang aton tumandok nga pulong ilabi na sa bahin sang aton pamatan-on agud mangin mas mangin mabakod ini kag aton mapabilin”, siling ni Parangan.
Ang mga pumalasakop, nagapangidaron 10 tubtub 14 anyos, ang ginhatagan sang tatlo ka piyesa ginkuha sa libro sang “Pangbata nga Sugilanon kag Binalaybay” agud ila pilian para sa ila oral presentation nga indi magsobra sa lima ka minutos.
Koleksyon sang mga estorya sa Hiligaynon para sa mga kabataan nga may moral values, ang “Pangbata nga Sugilanon kag Binalaybay” ginsulat sang mga katapo sang Sumakwelan Iloilo, Inc., organisasyon sang mga manunulat kag mamalaybay nga Ilonggo.
Tinutuyo sang organisasyon nga mapalapnag kag maamligan ang pulong nga Hiligaynon sa nanuhaytuhay nga plataporma kag aktibidad indi lang sa lokal apang sa nasyunal nga bahin. Sang 2014, ginbaton sang Sumakwelan Iloilo, Inc. ang Gawad Pedro Bucaneg nagikan sa Unyon ng Manunulat sa Pilipinas (UMPIL). (AAL/LAF/PIA Iloilo)
