SYUDAD SANG ILOILO (PIA) — Ginlunsar sang Family Planning Organization of the Philippines (FPOP) Iloilo Chapter, upod ang Commission on Population and Development (CPD) Region 6, ang Family Planning and Wellness Clinic sang Oktubre 24, 2024 sa CPD Region 6 Training Center sa banwa sang Pavia, Iloilo.
Sa iya mensahe, ginahatagan importansya ni Regional Director Harold Alfred Marshall sang CPD 6 ang pagtukod sang klinika, nga natuman bangud sa patinguha sang duha ka mga opisina, bilang pagpakita sang katumanan sang ahensya sa pagpasanyog sang Responsible Parenthood and Family Planning Program (RPFP) nga nabalhag sa Philippine Population and Development-Plan of Action (PPD-PoA) 2023-2028.
Dugang pa ni Marshall nga pinaagi sa ila pagbinuligay malambot sang sini nga klinika ang lokal nga mga komunidad kag mahatagan sang nagakaigo nga atensyon ang sexual kag reproductive health rights sang publiko, ilabi na gid sa mga sektor nga ila gintutokan kaparehas sang mga pamatan-on, mga kamal-aman kag ang nalakip sa mahuyang nga sektor.
Magaserbe ang klinika bilang lugar sa paghatag sang kinahanglanon nga mga serbisyo sa reproductive health kag kaayohan para sa mga residente sang Pavia kag mga kaiping sini nga kabanwahanan.
Ginatan-aw man sang direktor nga mabuligan sang ini nga klinika ang naga-existir na nga mga primary health care providers pinaagi sa rural health units sang mga LGU.
Maglowas sa pagpasangkad sang ihibalo sa reproductive health kag wellness services sa idalom sang RPFP, igapromotir man sang in inga klinika ang iban pa nga mga programa nga ginatutokan sang CPD kaangay sang Adolescent Health and Development (AHD) information kag mga serbisyo lakip ang counseling kag screening para sa Human Immunodeficiency Virus (HIV).
Kaupod ni Marshall sa pagbukas sang bag-o nga klinika sanday FPOP National President kag CPD Board Commissioner Nandy Senoc, FPOP Iloilo Chapter manager Mona Liza S. Diones, Department of Health (DOH) Western Visayas Local Health Support Division chief Dr. Mary Ann Soliva-Sta. Lucia, kag ang mga taglawas sang local nga pamunoan sang probinsya sang Iloilo kag banwa sang Pavia.
Apang, sa mensahe ni Comm’r Senoc, iya ginhatagan igtalupangod ang kolaborasyon sa tunga sang FPOP kag CPD nga nasandig sa madalom nga relasyon sang duwa ka institusyon kon sa diin nangin instrumento ang FPOP sa pagtukod sang CPD agod mapabaskog ang programa sang gobyerno nga nakatutok sa family planning kag pagpasanyog sang populasyon.
Kadungan sang pagbukas sang klinika, naghatag man ang FPOP sang serbisyo sa mga una nga pasyente sini kag nagbutang sang mga booth sa pagpromotir sang ila mga serbisyo.
Ang Family Planning ang Wellness Clinic bukas para sa tanan Lunes tubtob Biyernes halin alas otso sa aga tubtob alas singko sa hapon. (AAL/FRG/PIA6)
