Georgia

No. of :

No. of Shares:

Currently viewed by: Marcus Rosit

Samahan ng magsasaka sa Bicol, nagpasalamat sa tulong ng DAR

Pagsasaka mas napadali, kita mas nadagdagan

LUNGSOD NG LEGAZPI (PIA) -- Kung dati ay inaabot ng isang linggo ang pagbubungkal ng lupang sakahan, ngayon ay isa hanggang dalawang oras na lamang gamit ang tractor mula sa Department of Agrarian Reform, kaya naman mas tipid na at mas malawak na ang matataniman.

Ito ang kwento ni Cynthia Goyena- Lisay, pangulo ng SARIGAN cooperative mula Daraga Albay, na isa sa mga Agrarian Reform Beneficiaries Organizations (ARBOs) na natulungan ng DAR.

“Itong tractor nakatulong sa amin dahil hindi na kami gagamit ng kalabaw kaya madali na ang pagsasaka, kasi in one hour madali nang mabungkal yung lupa,“ ani Nanay Cynthia.

Kasama ang 225 magsasakang miyembro ng Sa Agrarian Reform Iriba Gabos sa Kauswagan Multi-Purpose Cooperative (SARIGAN MPC) ng Daraga Albay sa mga natulungan ng DAR na madagdagan ang kita sa pagsasaka.

Kwento nya, nasa P500 kada araw ang bayad sa mag-aararo na inaabot ng isang lingo para sa isang ektaryang lupa, samantalang P1,500 ang pagrenta ng tractor.

“Nung dati nasa P15,000 lang income namin sa one year, ngayon nasa P30,000 a year na pag madami ang nagpapatractor na farmers. Nung wala pa kaming equipment, minsan two years yun na walang kita kasi yung mga farmers nahihirapan mag engage sa farming kasi ang mahal ng bayad kung magpapaarado,” dagdag pa ni Lisay.

Nitong Agosto 18, pinangunahan ni DAR Secretary John Castriciones ang muling pamamahagi ng mga farm equipment and machineries sa 12 ARBOs mula Albay, Masbate at Catanduanes.

"Ngayong hapon na ito papatunayan natin na dapat bigyan natin ng pagkilala ang ating mga magsasaka, kaya marami tayong ibibigay na ayuda at mga tulong sa ating mga magsasaka,” ayon kay Castriciones.


Muli ring hinimok ni Castriciones ang mga magsasaka na maging miyembro ng kooperatiba at mga ARBOs upang mapakinabangan ang mga programa at serbisyo ng DAR, kasama na ang mga tulong pinansyal na layuning mapalakas ang agrikultura sa bansa at matulungan ang mga magsasaka na mapalago ang kanilang sakahan at mapaunlad ang kanilang pamumuhay.

Isa rin ang Dororian Farmers Producers and Livelihood Association (DOFAPLA) sa Catanduanes an tumanggap ng motorsiklo para sa mga magsasakang miyembro nito.

Para kay Mario Dio, magsasaka mula Catanduanes, naging mas madali ang pagbenta ng kanilang mga produkto dahil sa ayudang bigay ng DAR.

“Napakalaking halaga nito, katulad nitong tricycle, malaking tulong ito sa aming asosasyon kasi yung aming produckto ay madali nang mailalabas sa pamilihan,” pahayag ni Dio.

Bahagi rin ng tulong ang pag-ugnay sa mga magsasaka at mga ahensya ng pamahalaan upang mapadali ang pagbenta ng kanilang mga produkto, kasama na rito ang P1.4 million worth Enhanced Partnership against Hunger and Poverty ng National Nutrition Council.

“Dito sa 1st project with NNC, pumapatak almost P1.4 million sa akin lang sa 1st District. Ako ang pumasok na consolidator from Sto Domingo, Bacacay, Malilipot, Tabaco, Malinao at Tiwi,” ani Cesar Baron, pangulo ng Vinicasan Irrigators Association mula Bacacay Albay.

Ani Baron, sobra sa 2,000 magsasaka sa 1st District ng Albay ang matutulungan ng proyektong ito.

Dagdag panawagan niya sa kanyang kapwa magsasaka na makiayon na rin sa mga kooperatiba ng magsasaka upang mapakinabangan ang mga tulong na binibigay ng pamahalaan tulad ng libreng pagsasanay at mga kagamitan upang mas mapalago ang kanilang ani at mas madagdagan pa ang kanilang kita. (SAA/PIA5/Albay)


About the Author

Sally Altea

Writer

Region 5

Feedback / Comment

Get in touch