SYUDAD SANG ILOILO (PIA) — Ginpalawig pa sang Employees’ Compensation Commission (ECC) ang filing period sang mga seafarer para sa ila compensation claim sa mga balatian kag kasamaran kaangut sa trabaho.
Sa Sirkular Numero 2024-01 nga ginpaguwa ni Executive Director Atty. Kaima Via B. Velasquez, ang ECC nagtukod sang bag-o nga starting point para sa tatlo ka tuig nga prescriptive period para sa sini nga mga claim.
Ginpahayag ni ECC Regional Extension Unit 6 (REU 6) Representative Stephene Barredo nga ini nga sirkular ang importante nga tikang sa pagpat-ud nga ang mga seafarer may yara sang nagakaigo nga oras sa pagfile sang ila claim bangud sang pinasahi nga pagpanghangkat nga ila ginaatubang samtang ara sa dagat.
Sa idalum sang panibag-o nga guidelines, ang tatlo ka tuig nga period sa pagfile sang Employees’ Compensation (EC) claim ang magasugod humalin sa petsa nga ang seafarer nagpanaug nga nabalhag sa ila Seafarer’s Record Book. Ginakilala sining pagbag-o ang kabudlay sa dagatnon nga trabaho kalakip ang limitado nga internet access kag logistical challenges nga makaupang sa ila pagsumiter sang ila claim samtang sa dagat.
“Setting the reckoning date from disembarkation aims to provide seafarers with more time and support. It reflects our commitment to their health and rights, ensuring they can access the benefits they deserve without undue pressure,” pahayag ni Barredo.
Ang sirkular ang kaangut man sa naga-exister nga mga Board Resolution natuhoy sa evaluation sang mga claim para sa Permanent Total Disability (PTD) kag Temporary Total Disability (TTD) nga naka-outline sa nagligad nga regulasyon.
Suno pa kay Barredo ang ECC nagalaum nga ang ining adjustment maga-streamline sa claim process para sa mga seafarer nga tuman naman ka importante sa ekonomiya sang pungsod.
Gin-enganyo man sini ang tanan nga tagsakdag, partikular ang mga seafarer kag ila pamilya nga hibaluon nila ining mga bag-o nga pagbag-o ukon bag-o nga guideline nga iga-implementar gilayon.
“We urge everyone to take note of this important change and to seek assistance if they need help navigating the claims process,” dugang ni Barredo.
Nagapabilin ang ECC nga komitido sa pagtib-ong sang kinamatarung kag kaayuhan sang mga seafarer kag sa pagpat-ud nga sila ang nakabaton sang kinahanglanon nga suporta sa tion sang pagkinahanglan.
Ang mga seafarer kag interesado nga partido mahimo makabisita sa opiyal nga website sang ECC sa ecc.gov.ph ukon mag-contact sa ECC-REU6 sa (033) 3300910 ukon via email sa [email protected] para sa dugang nga imporasyon. (AAL/LAF/PIA-Iloilo/ECCREU6)
