SYUDAD SANG ILOILO (PIA) — Ginbuksan na sang Department of Agrarian Reform (DAR) sa Kabisayaan Nakatungdan ang pagbaton sang mga entries para sa “PelikulAgraryo” 2025.
Ini ang labing una nga film festival nga ginatanyag sang DAR, sa idalom sang Strategic Communication Sub-Component sang Project SPLIT ukon Support to Parcelization of Lands for Individual Titling.
Bukas ini para sa mga estudyante sang communication ukon media-related nga kurso nga naga-eskwela sa pribado ukon pampubliko nga unibersidad ukon kolehiyo.
Suno sa report sang DAR Western Visayas, ang PelikulAgraryo bukas para sa mga narrative films ukon mga pelikula nga nagasaysay sang matuod nga mga inagihan kag mabinungahon nga mga istorya sa kabuhi sang mga agrarian reform beneficiaries (ARBs) kag agrarian reform beneficiary organizations (ARBOs).
Magahatag sang premyo nga nagalab-ot sa P180,000 para sa magadaog sa ini nga film festival.
Dugang pa, ang magadaog sa rehiyonal nga lebel mangin representante sang Kabisayaan Nakatungdan sa nasyonal nga hugnat sang kompetisyon sa magaabot nga Abril subong nga tuig.
Ginalauman sang DAR ang pagsumitir sang mga entries indi maglagpas sa Pebrero 28 subong nga tuig.
Para sa mga interesado nga magpasakop sa kompetisyon, ginaabisohan sang ahensya nga magpakig-angot kanday Geric De la Cruz sa numero nga (0995) 525 1103 kag Lea Jane Cabalfin (0995) 525 1103 ukon (0946)983 5131. (AAL/FRG/PIA6/lakipan sang report gikan sa DAR Western Visayas)
