SYUDAD SANG ILOILO (PIA) — Nakumpleto na sang Department of Public Works and Highways (DPWH) 6 paagi sa Iloilo 2nd District Engineering Office ang pila sa mga flood control projects para sa Iloilo rivers nga tinutuyo ma-improba ang kapasidad sang mga komunidad nga makapamatok sa pagbaha kag soil erosion.
Ginpunto ni DPWH 6 Regional Director Sanny Boy O. Oropel nga ang ini nga mga proyekto kabahin sa padayon nga mga tikang para masabat ang mga infrastructure needs sang Iloilo bangud sa nagadamo sini nga populasyon.
Ang mga bag-o nga estraktura para sa flood control ginalauman nga magahatag sang malawig nga proteksyon kag maga-improba sang kalidad sang kabuhi sang mga residente sa mga apektado nga lugar.
“These flood controls are vital for safeguarding our communities against the devastating effects of flooding and soil erosion. This is our commitment to enhancing the safety and resilience of Iloilo’s towns, especially those residents living along the river,” siling ni Oropel.
Isa sa mga key projects amo ang P34.2-milyon nga flood control project nga yara sa may Jalaur River sa Barangay Bongco, Pototan. Sakop sang proyekto ang konstruksyon sang 160-lineal meter concrete slope protection kaupod ang reinforced embankment works kag metallic-coated gabions, gindisenyo para mapamatukan ang soil erosion kag mabaskog nga ulan. Ini ginalantaw nga magaserbe nga depensa sang lugar batok sa pagbaha.
Isa pa gid ka mayor nga proyekto sang DPWH 6 amo ang P72.2-milyon nga proyekto sa may Jalaur River, sakop ang Barangay Sohoton tubtob Barangay Patag sa Barotac Nuevo. Lakip sa sini nga proyekto ang konstruksyon sang 341-meter flood control structure nga ginabug-osan sang concrete revetment wall kag steel sheet pile foundation, nga magahatag sang kritikal nga depensa batok sa pagbaha sa lugar.
Dugang pa diri, sa Calinog, Iloilo, nakumpleto man sang DPWH 6 ang P24.5-milyon nga proyekto sa may Alibunan River. Dala sa sining proyekto ang konstruksyon sang 218-lineal meter flood control kag slope protection kaupod ang Portland Cement Concrete Pavement (PCCP), flood wall, kag lined canal.
Ang P25-milyon nga proyekto sa may Ulian River sa Dueñas nagalakip naman sang pagtukod sang flood control kag slope protection measures para mapahagan-hagan ang epekto sang mabaskog nga pag-ulan kag malikawan ang soil erosion nga magaprotektar sang kabuhi kag mga propedad sa landslide-prone areas.
Subongman, nakumpleto sang DPWH ang P28.8-milyon nga flood control kag slope protection project sa may Tigum River sa Cabatuan. Lakip sa proyekto ang 212-lineal meter concrete revetment wall kag pagbutang sang 3,075 meters nga steel sheet piling. (AAL/AGP/PIA 6 kalakip ang mga balita gikan sa DPWH 6)
