SYUDAD SANG ILOILO (PIA) — Nakabenepisyo sa mga komunidad sa Iloilo ang community-based Forestland Management Project (FMP) nga isa ka 11 ka tuig nga kooperasyon sang Japan International Cooperation Agency (JICA) kag Department of Environment and Natural Resources (DENR).
Paagi sa FMP, nakapatigayon sang reforestation activities para mapalapad ang forest cover, naghatag man sa mga People’s Organization (PO) sang capacity development para mas mapabakod ang ila management capacity, naka-establisar sang local enterprises development para mapataas ang kita sang tagsa ka panimalay, kag nagpatukod sang farm-to-market roads, pathways, concrete kag hanging bridges, kag irrigation pipeline system para makabulig sa konserbasyon sang mga kagulangan.
Ang nasambit nga proyekto gina-implementar sa tatlo ka mayor nga river basins lakip ang Upper Magat kag Cagayan, Pampanga, kag Jalaur.
Nagbisita ang JICA kag DENR joint monitoring team sa banwa sang Janiuay, Lambunao, kag Calinog, Iloilo nga sakop sang Jalaur River Basin sang damlag lang para mahibal-an ang mga nalab-ot sang proyekto paagi sa mga diskusyon kaupod ang 22 ka partner POs, komunidad, kag lokal nga pangulohan.
Nahibal-an nga may ara na 13,027 ka ektarya nga bag-o nga tree kag agroforestry plantations, 16.44 porsyento nga pagtaas sa vegetative cover gikan sa 2015 tubtob 2021 Geo-Spatial Data Analysis, kag 600 kilogramo nga coffee beans sa tagsa ka ani sa kada tuig.
May yara man nga mga komento gikan sa mga benepisyaryo kaangay nga ang FMP nagpalig-on sang mga relasyon sang komunidad. Amo man, ang pagtukod sang agroforestry support facilities nag-improba sang access sang publiko sa basic social services kaangay sang edukasyon, healthcare, kag ekonomiko nga mga aktibidad ilabi na para sa mga mangunguma.
Sa isa ka komunidad sa Marandig, Calinog, kon pakadto sa syudad sang Iloilo nga amo ang rehiyonal nga sentro, masami nagalab-ot ini sa tatlo ka adlaw (round trip) apang subong ini nagnubo na sa wala pa anum ka oras.
“The FMP has improved my income and enabled me to send my three sons to university. My sons also want to be involved in forest conservation,” siling ni Jimmy Rapista, isa ka pumuluyo sang Panuran, Janiuay.
Suno sa DENR, kritikal sa kadalag-an sang proyekto ang kolaborasyon sang tagsa ka komunidad.
“We need to change individuals to change the society,” suno kay Forester Raul L. Lorilla nga Regional Executive Director sang DENR 6.
Ginpahayag naman sang DENR ang ila intensyon nga padayon ini nga magasuporta sa mga komunidad kag mga lokal nga pangulohan sa paglakip sang FMP sa ila regular nga mga aktibidad sa mga madason nga inadlaw.
Sa pihak nga bahin, ang JICA nangako naman nga ini padayon nga makig-angot sa Pilipinas halin nasyonal tubtob lokal nga lebel para sa mas kalidad nga pagpa-uswag sang mga kagulangan. (AAL/AGP/PIA 6 kalakip ang mga balita halin sa JICA Philippines)
