DAVAO DEL NORTE (PIA) — Dakong dungog ang nabati sa Talaingod Municipal Tourism Office mahitungod nausab ang imahe sa munisipyo gikan sa terorismo ngadto sa pag-ila ini isip tourism destination, dungag pa nga daghang imprastraktura ang napatukod pinaagi sa P200-million Tourism Development Program ni Governor Edwin “Kuya Gov” Jubahib.
Kahinumduman nga kining maong proyekto apil sa 13-point Development Agenda ni Gov. Jubahib nga Sustainable Tourism, diin tumong nga mas mapalambo ang turismo sa probinsya.
Sa pakighisgot kay Municipal Tourism Officer Elmer Fernandez, iyang gisaysay ang epekto sa paglambo sa mga talan-awon sa Talaingod sanglit mas nidagsa ang mga turista na walay kahadlok nga nabati.
“Kana palang na change of term, from terrorism to tourism, pasabot dako jud ang improvement. Sauna, mahadlok ang mga tao na muanhi diri, karun ginadayo na ang Talaingod. Kana gyud nga impact ang dako kaayo nga nabutang sa mga katawhan. Happy gayud ang tanan, especially ang mga lumulupyo sa Talaingod,” sulti ni Fernandez.
Labot pa sa mga napatukod sa munisipyo sama sa gazebo glass bridge, 360 degrees viewing deck, development sa Uraya Agri-Tourism site, ug ang ginapaabot na konstruksyon sa pasalubong center ug restaurant building sa Milako Village, mao ang pangandoy sa lokal nga panggamhanan nga mas mapadaghan pa ang mabuhat nga mga proyekto.
“As tourism officer, daghan kayo mig mga plans, kanang 360 degrees, naa unta mi itukod diha nga zipline padulong diria sa Cliffs Café. Kung naa pajud enough budget, magbuhat mi ug bridge, ang local term is Ubal bridge. Daghan pa kog gusto unta, not only me but also the mayor and our municipal administrator, daghan kaayo silag mga plano nga mga projects, mga tourism establishment, ug mga site development projects para mas ma feature pajud ang Talaingod,” ingun ni Fernandez.
Dungag pa niya, dako ang iyang pasalamat sa Probinsya sa Davao del Norte ilabi na kay Gov. Jubahib tungod ang maong kalamboan nahimong rason nga nadungagan ang local income sa katawhan ug daghang trabaho ang nahatag sa mga lumulupyo, labi na sa mga lumad.
“Dako kaayo akong kalipay ug pagpasalamat especially sa Provincial Government headed by Kuya Gov, nga ubay ubay iyang na-bubu na projects dinhi sa Talaingod, especially kaning one-of-a-kind state of the art nga gazebo glass bridge, kay unique siya sa other na mga tourism projects pud na gihatag ni Gov. Makita pud nako nga naa pud siyay dako nga gugma, dako nga heart sa Talaingod, maong dili lang pud ako ang nalipay kundi pati tibuok katawhan sa Talaingod,” pagpasalamat ni Fernandez.
(Story by Cathy Jane Florida, One DavNor News/JMDA-PIA DavNor/ Photo by One DavNor News)
