SYUDAD SANG ILOILO (PIA) – Naghatag sang isa ka manami nga eksperyensya para sa mga Ilonggo kag turista ang ginhiwat nga opening salvo sang Kasadyahan sa Kabanwahanan sang Enero 9, 2025 bangud sa pagpasundayag sang mga tribu kun sa diin ang ila performances ang nga naga-angot sa ‘fun, foodie, friendly’ nga tagline sang Iloilo.
Siyam ka mga tribu gikan sa nagkalain-lain nga banwa sa probinsya ang nagpakita sang ila kaugalingon nga mga lokal nga festivals sa tion sang ila dance-drama routines sa Iloilo Freedom Grandstand kag sa atubang sang Casa Real, nga nagapakita sang mga kultura kag tradisyon.
Ang mga grupo nga magapasakop sa grand competition sa Enero 25 amo ang Tinu-om Festival sang banwa sang Cabatuan, Kaing Festival sang Leon, Tangyan Festival sang Igbaras, Banaag Festival sang Anilao, Cry of Jelicuon sang New Lucena, Tawili Festival sang San Rafael, Haw -as Festival of Dumanggas, Hirinugyaw-Suguidanonay Piesta sang Calinog, kag Pista sang Tultugan sang Maasin.
Samtang, ginpahayag ni Iloilo Gov. Arthur Defensor Jr. nga ang Kasadyahan nagaserbe nga entablado sang probinsya para mapakita ang nagkalain-lain nga kultura sang mga banwa nga makabulig gid sa pagpasanyog sang turismo sang Iloilo.
“This Kasadyahan Festival evolved into our cultural stage. We are presenting the culture and life of the city and province of Iloilo. Our ‘Fun, Foodie, Friendly’ festival is a mixture of different traditions. We have history, religious traditions, agriculture, and more. This is our contribution to the celebration of the Dinagyang Festival 2025,” pahayag ni Defensor.
Para sa sini nga tuig, naghatag ang probinsya sang P2 milyones nga subsidiya para sa mga nagapasakop nga banwa kag nag-alokar sang kabug-usan nga P3 milyones nga premyo.
Sang nagligad nga tuig, gindeklarar nga Kasadyahan sa Kabanwahanan champion ang Tultugan Festival sang Maasin, Iloilo, ginsundan ini sang Hirinugyaw-Suguidanonay Festival sang Calinog bilang first runner-up kag Kaing Festival sang Leon bilang second runner-up. (AAL/JNH/PIA Iloilo)
