SYUDAD SANG ILOILO (PIA) – Nagpatigayon sang isa ka fun run ang Regional Inter-Agency Committee Against Trafficking and Violence Against Women and their Children (RIACAT- VAWC) 6 kaupod ang mga nasyonal nga ahensya sang gobyerno kag non-governmental organizations kaangot sa selebrasyon sang World AIDS Day sang Disyembre 1 sa Iloilo City.
Ini bilang kabahin sang inisyatibo para sa pagpalapnag sang ihibalo tuhoy sa nasambit nga balatian.
Ang pambungad nga programa ang ginhiwat sa Atria Park District, Mandurriao, Iloilo City.
Kapin 600 ka mga partisipante kag advocates ang nagrehistro para makigbahin sa aktibidad.
Sa mensahe nga gindul-ong ni Dr. Patricia Tobias sang Western Visayas Medical Center, nga amo isa sa mga nag-organisa, ang World AIDS Day Fun Run indi lamang nahanungod sa pagdalagan kundi ini isa ka pagtililipon para sa isa ka kawsa.
“Today honors those that have been impacted by HIV and AIDS, whether directly or through the loss of loved ones,” siling ni Tobias.
Iya man ginpunto nga ang fun run tinutuyo nga mapasangkad ang importansya sang paglikaw kag pagbulong para suportahan ang nagapadayon nga paghangkat nga tapnaon ang stigma sa virus.
Ang ini nga inisyatibo naangot man sa 18-day Campaign to End Violence Against Women nga nagsugod sang Nobyembre 25 tubtob Disyembre 12.
Ang iban pa nga mga advocacy campaigns nga ginpangunahan sang RIACAT-VAWC kaangot sa selebrasyon amo ang Orange Run: An Advocacy Run to End VAWC; Orange Your Icon Lighting Ceremony sa Guimaras; kag pagtukod sang Orange Help Desk sa mga strategic areas sa rehiyon. (AAL/AGP/PIA 6)
