SAN JOSE, Antique (PIA) — Nagpanawagan ang Provincial Gender and Development Inter-Agency Committee (GAD-IAC) sa mga barangay nga dapat aktibo ang anda Violence Against Women and their Children (VAWC) Desk.
Suno kay Provincial GAD coordinator Prisceli Joyce J. Galuego, ang VAWC desk amo ang may pinakaimportante nga papel nga magatugro kang suporta sa mga biktima kang pagpang-abuso sa kababaihan kag kabataan.
Dapat ang mga opisyales may kaaram kag nahanas kung paano magkapot kag magresponde kang biktima kang VAWC sa barangay.
Suno sa Republic Act 9710 ukon Magna Carta of Women, dapat sa kada barangay may aktibo nga Violence Against Women (VAW) Desks.
Dugang pa ni Galuego, ang probinsya kang Antique gintugruan kang award nga Seal of Good Local Governance ukon SGLG kag ginkilala sa anang pagsunod sa GAD indicators.
Nagkuon man tana nga ang Office of the Provincial Planning and Development Officer ukon OPPDO paagi sa provincial Inter-Agency Committee on GAD nagapasiguro nga ang programa kag mga aktibidad ginataw-an ka poryento nga alokasyon para sa GAD program suno sa nakabutang sa layi.
Ana man ginkilala ang inisyatibo kang Provincial Population Office, Social Welfare and Development, kag Health Office nga nagatuyo sa pagpadugang kang kaaram kang katawhan tuhoy sa gender sensitivity kag women empowerment.
Ang probinsya naga-organisa kang KATROPA (Kalalakihang Tapat sa Responsibilidad at Obligasyon sa Pamilya), ERPAT (Empowerment and Reaffirmation of Paternal Abilities), KALIPI (Kalipunan ng Liping Pilipina), kag iba pa nga mga organisasyon nga tinutuyo nga pataason ang pag-intindi kang katawhan tuhoy sa responsibilidad kang ginikanan, women empowerment, kag gender sensitivity.
Ana man ginreport nga ang Angel Salazar Memorial Hospital may rugyan ron nga Women and Children Protection Unit (WPCU) nga pwede maparapitan kang biktima kang pagpang-abuso.
Sa paghiwat kang Women’s Month, ang GAD-IAC nagpatigayon kang programa sa EBJ Freedom Park kang Marso 3 kung sa diin ang mga empleyado nagsaot kang “One Billion Rising” Dance Campaign para untaton ang VAW, samtang ang culmination program nakatalana sa March 25 sa Bugasong, Antique nga may caravan nga serbisyo para sa mga kababaihan. (AGP/PSM/PIA Antique kaimaw ang mga balita halin kay JYD/UA intern)
