Laragway: DOLE Western Visayas
SYUDAD SANG ILOILO (PIA) — Ginkadtuan sang Department of Labor and Employment (DOLE) sa Western Visayas para magdul-ong sang interbensyon ang isa ka barangay nga may yara na-establisar nga Indigenous People (IP) community nga may yara Certificate of Ancestral Domain title, kon sa diin ang primero nga palangabuhian amo ang produksyon sang mais kag palay.
Ang barangay, nga kapin 18 ka kilometro halin sa syudad, makita sa kabukiran sang Kabankalan City, Negros Occidental.
Nakita sang lokal nga panguluhan sang Brgy. Carol-an nga ang komunidad may potensyal para paayuhon ang ila kondisyon pang-ekonomiko kung mahatagan suporta kag nagakaigo nga mga pasilidad. Gani, nagsumite ini sang proposal para sa Corn and Rice Milling and Trading System sa DOLE Western Visayas.
Ang mga lokal nga lider ginalantaw ang accessible kag community-based milling facility magahatag indi lang sang mga mapuslanon nga serbisyo kundi sang mga oportunidad para makakuha sang palangitan-an para ma-improba ang kalidad sang kabuhi sang kapin 150 IPs nga nagapuyo sa barangay.
Ang kinhanglanon kag potensyal sang proyekto nagduso sa rehiyonal nga opisina sang DOLE para aprubahan ang proposal kag tseke para sa livelihood assistance nga nagabalor P1,476,100.
Ginmanduan ni DOLE Regional Director Sixto T. Rodriguez Jr. ang livelihood team sang ahensya nga maghatag sang tanan nga posible nga bulig sa komunidad.
Matapos malampasan ang nga paghangkat, opisyal nga ginturn-over sa komunidad ang Corn and Rice Milling and Trading Project kag palay.
Sa presensya sang galingan nga pasilidad, ginalantaw nga mapanubo ang gasto sa produksyon, makakuha sang dugang nga kita, kag makadihon sang mga oportunidad sa lokal nga trabaho. (AAL/AGP/PIA 6 kalakip ang mga balita gikan sa DOLE Western Visayas)
