TAGBILARAN CITY, Bohol, Feb. 6 (PIA) — Gitugot sa kagamhanang probinsyal sa Bohol ang pag-ambitay sa bayranan sa paggamit sa mga himan sa tambalanan nga iya niini, sama sa pagpahigayon og hemodialysis.
Gani, gitugot usab ang makigsabot ang pasyente sa bayronon, ilabi na kon may local nga kagamhanan nga mogarantiya, o may bahinay sa bayronon kon motampo niini ang iyang local nga kagamhanan.
Kini kay gikatakda na sa Sangguniang Panlalawigan ang kantidad sa pagpahigayon og hemodialysis sa mga tambalanan nga iya sa kagamhanang Probinsyal.
Bisan pa kon nahisakop na sa Universal Health Care Program sa Philippine Health Insurance Corporation (PhilHealth), kadtong mga pasyente nga may suliran sa ilang kidney ug manginahanglan og dialysis aron mao nay molimpyo sa dugo, kinahanglan pa gihapon nga mobayad og P1,000.
Kini kay, dili libre ang mga himan nga gamiton sama sa dagum pantupok, mga panalipod aron magpabiling anaa sa steril nga kahimtang ang pasyente samtang gipailawom sa procedure.
Sa Ordinansa nga giduso ni Board Members Aldner Damalerio ug Elpidio Bonita, gipalubad didto ang gahum sa local nga kagamhanan sa pagkolekta ug makatarunganon nga bayad sa mga serbisyo nga itanyag niini, ilabi na sa serbisyo sa mga tambalanan nga gipadagan ug gimintinar sa kagamhanan sa Bohol.
Ug sama sa gitakda nga balayranan sa ubang mga tambalanan, P2,600 usab ang tingil sa mga mopailawom sa dialysis sama sa coverage nga tubagon sa PhilHealth subay sa iyang case rate schedule.
Subay sa bayranan, kini alang sa 4 ka piraso nga arterial o vein Fistula Needle, 4 ka piraso nga single non-sterile nga gwantis, bloodlines, binola nga gapas, 4 ka piraso nga 4×4 nga sterile gauze, usa ka 2-inch hypoallergenic plaster, bicarbonate concentrate, AFM 12 Acid Concentrate, 4 ka botelya nga sodium chloride normal saline solution, 2 ka piraso nga Povidone iodine antiseptic 5x 5cm wipes, 2 piraso nga alcohol pads 70% o swabs, 3 ka disposable nga injection ug dagum, 3 ka piraso nga disposable syringes sa 5 cc apil ang dagum, us aka vial nga Heparine Sodium sa 1000 units per 5ml ug Renaline alang sa ginamit nga dialyzer.
Samtang dili kini personal nga bayaran sa pasyente nga sakop sa Philhealth, gikinahanglan nga pangandamans a pasyente ang alang sa Erythropoeitin Injection 4000 UI nga tag P800, 2 ka piraso nga sterile gloves sa tag P50 ang usa, us aka tourniquet sa tag P50, us aka surgical face mask sa tag P10, usa ka disposable surgical head cap nga tag P20.00 ug face shield nga tag P30.
Kining tanan, mosumada og P1,000.
Kon ang pasyente wala masakop sa PhilHealth, kinahanglang pa usab niyang mobayad sa bag-ong dialyzer nga tag P4,800, nga tag P2,200 ra kon may PhilHealth, tungod sa subsidy sa kagamhanan.
Mao kana nga gawas sa P1,000 nga andamon matag adto sa dialysis center, kinahanglan pa niyang mobayad sa P350,00 nga professional fees alang sa medical specialist-Nephrologist, kon wala siyay PhilHealth.
Ug kay ang coverage sa PhilHealt taman ra sa 104 ka dialysis treatment sessions, ang dugang pa nga dialysis tubagon na sa pasyente.
Usa sa mga napahimutang sa Ordinansa nga anaa na sa katapusang pagbasa sa dili pa mapalagdaan sa gobernador, mao ang paghatag og discounts sa mga senior citizens ug persons with disabilities ug mga sakop ug opisyales sa Kagamhanang probinsyal, nga may automatic nga 20% nga kaltas sa bayronon. (RAHC/PIA7 Bohol)
