SYUDAD SANG ILOILO (PIA) — Ginpasidunggan sang pungsod si Gawad Manlilikha ng Bayan Federico “Tuohan” Caballero sa isa ka state funeral nga may lakip nga full military honors sa iya sini banwang natawhan sa Calinog sang Setyembre 3, ang adlaw mismo sang iya lubong.
Gindeklarar man sang Malacañang ang ina nga petsa bilang Day of Mourning. Suno sa layi, ang pungsodnon nga bandera dapat ipalupad sa half-mast halin sa pagbutlak sang adlaw tubtob sa pagtunod sang adlaw sa tanan nga mga talatapan sang gobyerno sa pungsod kag sa iban nga duog.
Madumduman nga nagtaliwan si Caballero sang Agosto 17 sa edad nga 87. Ang iya nga hamyang ang ginhiwat sang Agosto 21 tubtub Setyembre 2, kasunod sang paghiwat sang mga ritwal sa lubong sang Panay Bukidnon sang Setyembre 1.
Nalakip sa funeral honors ang mga mensahe nagikan kay Presidente Ferdinand Marcos, Jr., Sen. Loren Legarda, NCCA Chairman Victorino Mapa Manalo, NCCA Commissioner Reden Ulo, anay NCCA Chair Dr. Felipe de Leon Jr., Gov. Arthur Defensor, Jr. Mayor Francisco Calvo, anthropologist Dr. Alicia Magos, kag Gawad sa Manlilikha ng Bayan (GAMABA) Coordinator Merly Delfin.
Tuig 2000 sang ginkilala si Caballero bilang Gawad Manlilikha ng Bayan ukon National Living Treasure. Ang ini nga award makabig nga isa ka mataas nga pagkilala sang traditional folk artists, katumbas sa ranggo nga Order of National Artists. Kadungan sa ini nga tuig ginbuksan ni Caballero, sa bulig sang University of the Philippines Visayas (UPV) Center for West Visayan Studies, ang Balay Turun-an ukon School for Living Traditions sa Garangan, Calinog.
Tinutuyo sang ini nga aktibidad ang pagtudlo sang epic chanting kag mga tradisyon sa kultura sa mga kabataan sang Panay Bukidnon.
Sa karon, si Caballero ang nagaisahanon nga Gawad Manililikha ng Bayan nga nagikan sa Visayas. Siya ang ginhatagan man sang pagkilala sa pag-amba sang 10 Suguidanon Epics of Panay sa 13 volumes, nga ginpanalawsaw sang grupo sa UPV nga ginpangunahan ni Dr. Alicia P. Magos kag Associate Researcher Anna Razel Limoso-Ramirez nga nagsugod sang 1993.
Ang ini nga mga epics ang gin-transcribe kag ginbadbad sa Contemporary Kinaray-a, Filipino, kag Ingles para sa mga publications sang University of the Philippines Press sang 2013. Ang preparasyon para sa mga manuscripts ang natapos pinaagi sa research grant nagikan sa UPV sa idalom ni Chancellor Rommel Espinosa kag UP System sa pagpanguna ni President Alfredo Pascual. (AAL/LMLE/PIA Iloilo/UPV-IPO)
