TAGBILARAN CITY, Bohol (PIA) – Gkan sa 4.3 porsyento sa miaging tuig, misaka ngadto sa 6.3 porsyento sa ikaduhang kwarter sa 2024 ang ekonomiya sa nasud, segun pa sa taho sa Philippine Statistics Authority (PSA).
Gani, matud ni National Statistician sa PSA nga si Dennis Mapa, ang natala nga 6.3 sa ikaduhang kwarter, mas taas pa sa 5.8 porsyento nga gross domestic product nga nakab-ot sa nasud sa unang tulo ka buwan sa 2024.
Ang mga labing dagkong sektor sa ekonomiya nga industriya ug mga serbisyo parehos usab nga mingtala sa pagsaka: 7.7 porsyento sa industriya ug 6.8 porsyento sa serbisyo, bisan pa nga ang agricultura, forestry, ug pangisdaan mingkunhod ngadto sa 2.3 porsyento kay naangin sa mge epekto sa El Nino.
Segun sa PSA, ang mga nagasto alang sa pangunsumo sa mga kabalayan mingsaka usab ngadto sa 4.6 porsyento samtang ang paggasto sa goberno misutoy ngadto sa 10.7 porsyento.
Niini nga nga katikaran, mismo ang National Economic and Development Authority (NEDA) pinaagi ni Secretary Arsenio Balisacan mipadayag nga kini, mahimong magpahimutang sa nasud sa usa sa labing paspas nga ekonomiya sa tibuok rehiyon sa sidlakang Asya.
Sa mga gipagawas nga nga pagtubo sa GDP sa rehiyon, ang Pilipinas nagsunod lamang sa Vietnam nga may 6.9 porsyento samtang ang Malaysia anaa sa 5.8 prosyento, Indonesia sa 5.0 porsyento, China sa 4.7 porsyento.
Nagtuo si Balisacan sa NEDA nga ang gigasto sa kagamhanan sa pagpatuman sa mga programa sa pagpanalipod sa katawhan sa kaguton (social protection programs), mga programa sa health ug edukasyon ug sa pagpangandam sa piliay sa 2025, daku og gikatampo niining kalampusan. (RAHC/PIA Bohol)
