Sadya nga gi-selebrar sa mga residente dinhi ang Gini-akan festival.
Ang “Gini-akan” gikan sa pulong nga “gi-ok” nga usa ka pamaagi sa pag-refine sa clay pinaagi sa pagtamak niini. Ilado ang Baroy isip “Claytown” sa Lanao del Norte tungod sa daghang deposito sa clay nga ginagamitan sa pagbuo og mga paso.
Selebrasyon sab kini isip pagpasalamat kang Senior Sto. Niño, ang patron saint sa Baroy.
“Hinaot ko nga ang pagselebrar ni Sr. Sto. Niño makahatag og kaayohan, makahatag og kusog sa akong isig-usa para matabangan ta sa atong matag adlaw nato nga ato pagalihok-lihokon sa atong kinabuhi,” sumala ni Vice Mayor ug Acting Mayor Rosa D. Olafsson.
Nalakip sa highlight sa festival ang pagtigi sa tulo ka contingents sa Invitational Gini-akan Festival Street Dancing Competition kung asa gideklarar nga grand champion ang Lanao del Norte National Comprehensive High School (LNNCHS) nga midaog og P200,000 pesos nga cash prize. Nakuha sab nila ang Best Festival Queen Award.
“This is a nice opportunity sa mga bag-o, thankful mi nga nag-celebrate mi og nagpasalamat kay Sr. Sto. Niño,” sumala ni,” Julie Pacaña, usa ka performer gikan sa LNNCHS.
1st runner up ang contingent gikan sa Barangay Malingao sa lungsod sa Tubod ug nakuha ang P150,000 cash prize.
“Among mga team is dili lang taman barangay masayaw ilang skill kung dili ma-expose sa laing municipality. Aside ana, ma-build up ilang mga talent… ilang maexpose sa katawhan nga maghatag og kalipay og motivation,” sumala ni Patrick Solidum sa Barangay Malingao.
Samtang 2nd runner-up ang lungsod sa Jimenez sa Misamis Occidental nga nakuha ang P100,000 cash prize.
Ang maong kompetisyon ug uban pang mga aktibidad sa festival, gikalingawan sa daghang mga residente ug bisita sa lugar.
“Nalipay kaayo ko kay atong last street dancing kay wala ko kita karon naa ko chance makakita, nice gyud kaayo siya, makanimbawot sa feeling,” matod ni Marde Cueco, usa ka residente sa Barangay Poblacion.
Samtang, suportado sab sa Department of Tourism-10 ang paglambo pa sa turismo sa Baroy.
“We want to have it leveled up so that we can promote both locally and internationally. We’re planning to visit some of the clay establishments and ask for the participation and support of other agencies like DTI,” sumala ni Department of Tourism-10 Regional Director Marie Elaine S. Unchuan.
Sumala sab sa DOT, adunay plano nga dive exploration ug ang pagposisyon sa Lanao del Norte isip usa ka eco-agri destination. Ipahigayon sab karong tuig ang Philippine Experience Program sa Lanao del Norte ug Misamis Occidental aron ipakita ang katahom niini sa mga embahada ug mga stakeholders. (LELA/PIA-10/Lanao del Norte)
