DAVAO DE ORO (PIA) — Pormal na nga gipahigayon kadtong Mayo 18 ang groundbreaking ug time capsule laying ceremony sa “Ginintuang Paraiso” Public Park, nga tukoron sa Provincial Capitol Complex sa Davao de Oro.
Ang pagpatukod sa 613.84 sq.m nga parke nagkantidad ug Php 20 milyones nga gipunduhan sa Local Government Support Fund-Financial Assistance to Local Government Units (LGSF-FA to LGUs) ubos sa FY 2022 General Appropriations Act (GAA).
Naglangkob sa maong parke ang amphitheater events area nga adunay bleachers, ramp walkways, rentable stalls ug planting areas diin ang mga katawhan mamahimong mag-jogging, magpiknik ug uban pa.
Gilauman na mahuman ang pagpatukod niini sulod sa 200 calendar days kun sa Nobyembre 25 ning tuiga arun mahimong accessible na kini sa katawhan sa sunod tuig 2024.
Gawas kang Provincial Administrator Fatima Montejo nga nagrepresentar kay Governor Dorothy Montejo-Gonzaga, nitambong usab si DILG – Davao de Oro Cluster Head Ivy Mae L. Esteban uban sa mga department head sama ni Provincial Engineer Roderick Digamon, Provincial Budget Officer Eva Jean Licayan, Provincial Social Welfare Officer Josephine Frasco ug pipila ka kawani sa panggamhanang probinsyal. (PIA Davao de Oro/ PR from Provincial Government of Davao de Oro)
