BACOLOD CITY (PIA) — Handa ang gobyerno nga maghatag sang bulig sa mga Negrense nga maapektuhan sang padayon nga pag-alboroto sang Bulkang Kanlaon.
Ginpasalig sang Office of Civil Defense (OCD) kag Department of Social Welfare and Development (DSWD) sa Western Visayas ang publiko nga handa sila magresponde.
Suno sa OCD-6, naka-standby ang food and non-food items (FNFIs) sa ila bodega sa syudad sang Bacolod kag sa pasilidad sang Philippine Army (PA) Engineering brigade sa syudad sang Himamaylan.
Lakip sa FNFIs sang OCD sa syudad sang Bacolod amo ang 15 ka units sang gasoline generator sets, 650 ka bath towels, 188 ka rolyo sang sakoline blue sack (trapal), 321 ka shelter repair kits, kag 150 ka family packs.
Samtang, ang ila naka-preposisyon nga FNFIs sa Himamaylan City, nga ginhatag sang Philippine Amusement and Gaming Corporation (PAGCOR), ginalakipan sang bugas, bottled water, canned goods, kape, habol, moskitero, kag hygiene essentials.
Dugang pa, nagapadayon man ang procurement sang iban pa nga mga kinahanglanon sa evacuation centers.
Sa bahin sang DSWD, masobra 27,600 ka family food packs (FFPs) ang na-preposition, 15,600 diri yara sa ila bodega sa syudad sang Bacolod kag 12,000 ang yara sa mga local government units (LGUs). (AGP/BPS/PIA Negros Occidental)
