SYUDAD SANG ROXAS, Capiz (PIA) — Luyag sang Philippine Drug Enforcement Agency nga mahuna-huna sang mga nagagamit kag nagabaligya sang iligal nga droga nga ang gobyerno ang nagahatag sa ila sang oportunidad nga untatan ang iligal nga hilikuton kabaylo sang produktibo nga kabuhi.
Ginpahayag ni Jose Ramir Batuigas nga pinuno sang PDEA Capiz sa Kapihan nga programa sang Philippine Information Agency nga indi pa gid sang lapnagon ang iligal nga droga sa probinsya bangud 14 sa 17 ka mga lokal nga panguluhan sa probinsya ang may “drug-cleared” na nga mga kabaranggayan.
Gindugang pa sang opisyal sang PDEA nga ang banwa sang Panitan subongman Pontevedra kag Roxas City ang may nabilin pa nga kabaranggayan nga apektado pa sang iligal nga droga.
“Dapat ma-realize sang mga iligalista nga ang gobyerno ang nagahatag sa ila sang second chance. Amo gani nga may mga programa nga libre agud sila mag-reporma,” pahayag ni Batuigas.
Gindugang pa niya nga “wala gid na sang maayo nga idulot ang droga kag basi mag-abot ang adlaw mabiktima mo pa ang pamilya mo man.”
Nahibaluan nga kaangot sa Barangay Drug Clearing Program, ang kabanwahan sang Dao kag Jamindan ang nauna na nga gindeklara nga “drug-free municipalities” kag ginpasidunggan sang “Balangay Seal Excellence” sang tuig 2023 nga pinakamataas nga pagkilala nga ginahatag sa mga nagapatuman sang programa.
Samtang, gindugang pa ni Batuigas nga magaabot ang ti-on nga malab-ot gid sang kasuguan ang mga drug offenders bangud ang PDEA kag PNP ang indi mag-untat sa paglagas sa ila.
Ginghinyo man niya ang aktibo nga suporta sang mga opisyal sang barangay kag mga pumoluyo sa nagapadayon nga kampanya batok sa iligal nga droga. (AGP/AAL/PIA Capiz)
