SYUDAD SANG ILOILO (PIA) – Para mapabaskog ang preparasyon kag pagresponde sa kalamidad, opisyal nga gin-inagurahan sang Iloilo Provincial Government ang Disaster Risk Reduction and Management (DRRM) Inter-Agency Resilience Hub sa banwa sang Carles, nga nagaserbe nga isa sa mga kritikal nga pasilidad para sa emergency operations sa probinsya.
Ginpangunahan ni Governor Arthur Defensor Jr ang inagurasyon sang Marso 10, 2025 sang duha ka panalgan nga P10 milyones nga pasilidad nga ginpondohan paagi sa P5 milyones nga badyet gikan sa gobyerno probinsiyal kag P5 milyones man gikan sa disaster fund sang lokal nga panguluhan sang Carles.
Ginpahayag ni Defensor nga ang nasambit nga pasilidad ang orihinal nga gintan-aw bilang headquarters sang Provincial Bantay Dagat Task Force subong man para sa pagdumala sang Visayan Sea. Apang, ini ang ginhimo na isa ka sentralisado nga pasilidad nga magasabat indi lamang sa mga kalamidad, kundi sa pagbag-o sang klima, seguridad sa pagkaon, mga krisis sa ikaayong lawas, kag iban pa nga mga sitwasyon sa emerhensya.
Ang pasilidad magaserbe man bilang municipal extension sang Provincial Civil Defense Service of Iloilo (ProCiD Serv Iloilo), isa ka komprehensibo nga sistema agud atubangon ang pagnubo sang risgo sa kalamidad, pagkontrol sang balatian, insurhensya, kriminalidad, iligal nga droga, seguridad sa pagkaon, edukasyon, kag iban pa.
Ginalauman man nga masolusyunan sang pasilidad ang nagadamo nga pamahog sa ikaayong lawas, lakip na ang pagsaka sang kaso sang dengue sa probinsya.
“We recognize that there are prevailing, lingering, and continuing states of national emergencies. So, this facility that we give to municipalities will be the headquarters to take care of lingering state of emergencies,” siling ni Defensor.
Samtang, ginpahayag naman ni Provincial Disaster Risk Reduction and Management Office (PDRRMO) chief Ret. Colonel Cornelio Salinas nga ang Resilience Hub makapasanyog sang daku sa operational capacity sang mga local government units, partikular sa bahin sang disaster preparedness kag emergency response.
“Equipped with modern communication and monitoring tools, this hub will enable real-time information gathering, swift decision-making, and coordinated emergency response efforts. It will serve as a safe space for disaster planning, simulation exercises, and capacity-building programs for our responders and the community,” siling ni Salinas.
Ginpangunahan nanday Defensor kag Salinas ang programa kaupod sanday Carles, Iloilo Mayor Siegfredo Betita, Vice Mayor Arnold Betita II, Anilao Mayor Lee Ann Debuque, kag Office of Civil Defense VI 24/7 Operations Unit Head kag Regional Spokesperson Tina Mayor. (AAL/JNH/PIA Iloilo)
