SYUDAD SANG ILOILO (PIA) – Pormal nga ginlunsar sang gobyerno probinsyal sang Iloilo ang “alaLAYI: Pag-ubay Legal sa Kabataan” program kaupod ang Central Philippine University – College of Law (CPU-COL) sang Abril 8, 2025 bilang kabahin sang selebrasyon sang Semana sang Iloilo.
Isa ka memorandum of agreement ang ginlagdaan nanday Gov. Arthur Defensor Jr., CPU-COL Dean Atty. Aila Rae Endonila kag Department of Education (DepEd)-Iloilo Schools Division Superintendent Dr. Ernesto Servillon para sa programa, kun sa diin ini nagalaum nga mapauswag ang guidance services pinaagi sa pag-integrar sang legal education sa mga teen centers sa probinsya nga ginasuportahan sang Provincial Population Office (PPO).
“AlaLAYI literally means providing guidance to our learners and our students on the provisions of the law and the insights of jurisprudence, teaching them of legal rights and such other legal matters,” siling ni PPO head Atty. Von Superio.
Sa idalom sang programa, ang mga law student practitioner pinaagi sa CPU Legal Aid Clinic and Clinical Education Program (CLEP) magahatag sang mga lecture kag seminar sang nagakaigo nga mga layi sa mga teen center peer helpers, peer facilitators, kag mga estudyante sa hayskul. Pila sa mga topiko nga ila igatudlo amu ang gender-based laws, sexuality education, kag voter’s education.
Ang mga law student magahatag man sang legal nga bulig pinaagi sa legal advice, mga referral para sa legal nga representasyon, paghimo kag paghanda sang simple nga mga affidavit kag legal nga mga dokumento.
Ang una nga mangin benepisyaryo sang program amo ang mga teen centers sa mga banwa sang Alimodian, Leganes, Leon, New Lucena, Oton, Pavia, San Miguel, Santa Barbara, kag Zarraga.
Ginpahayag man ni Defensor nga ang programa nagapabakod sang pagduso sang gobyerno probinsyal sa pag-institutionalize sang transformative education sa mga sekondarya nga eskwelahan.
Ginpasalamatan sini ang CPU College of Law kag ang legal nga komunidad sa pagpakigbahin sa pagtudlo sa mga estudyante sang ila legal nga mga kinamatarong.
Lakip pa sa mga nagtambong sa programa sanday CPU-COL Assistant Dean Atty. Liza Lyn Lamason-Garcia, Commission on Population and Development-6 Regional Director Harold Alfred Marshall, Integrated Bar of the Philippines Iloilo Chapter President Atty. Mehelinda Penetrante, kag DepEd Iloilo School Governance and Operations Division chief Dr. Gilbert Solidum. (AAL/JNH/PIA Iloilo/kalakip ang report gikan sa Balita Halin sa Kapitolyo)
