SYUDAD SANG ILOILO (PIA) — Nakabaton sang mga cash incentives kag educational assistance gikan sa gobyerno probinsyal ang mga outstanding Ilonggo student athletes.
Ginpangunhan ni Provincial Administrator Raul Banias kag Iloilo Sports Development and Management Office (ISDMO) chief Dr. Janelyn Fundal ang pagpanghatag sa mga tseke sa 83 ka mga atleta nga nangin benepisyaryo sang educational assistance kag 23 ka mga atleta nga tagdaog sang mga medalya sa ginhiwat nga Batang Pinoy national sports competition.
Santo sa Provincial Ordinance 2019-199 ukon Iloilo Provincial Government’s sports educational assistance program para sa mga outstanding athletes, ang mga benepisyaryo mahimo nga makabaton sang P24,000 taga tuig.
Nalakip sa kantidad ang P2,000 nga monthly allowance para sa 10 ka bulan, uniform allowance nga P2,000 kag school supplies allowance nga P2,000.
Suno sa press report sang Kapitolyo, nakabaton sang P14,000 ang mga recipients sang educational assistance, samtang ang nabilin nga P10,000 ang igahatag sa ini nga tuig man.
Sa pihak nga bahin, ang Provincial Ordinance 2000-217 nagahatag sang cash incentives sa mga atleta nga may yara sang medalya gikan sa mga paindis-indis sa lebel sang regional, national ukon international.
Ginahatagan man sang nagakaigo nga insentibo ang mga coaches, assistant coaches, trainers, kag official chaperons sa ini nga ordinansa.
Ginpahayag man ni Banias nga ang gobyerno probinsyal nagdedikar sang daku nga kantidad agud pondohan ang mga programa sa isports kag pagtukod sang mga football fields sa mga mayor nga mga buluthuan, lakip man ang pagpatigayon sang school varsity program kag athletes scholarship program. (AAL/LMLE/PIA Iloilo with reports from Iloilo Province)
