Isa sa proyekto sang gobyerno probinsyal ang pagpatigayon sang ASF Recovery program nga may tuyo sa pagbulig sa mga kwalipikado nga hog farmers nga naapektuhan sang ASF. (Photo by: Iloilo Province)
SYUDAD SANG ILOILO (PIA) — Nagpagwa sang kabug-usan nga P9.6 milyon sa 13 ka mga kabanwahanan ang gobyerno probinsyal sang 2024 angot sa ginapatigayon nga African Swine Fever (ASF) Recovery Program.
Tuyo sang ini nga kantidad nga makabakal sang mga baboy agud ipanghatag sa mga kwalipikado nga mga hog farmers gikan sa banwa sang Barotac Viejo, New Lucena, Dingle, Banate, Sta. Barbara, San Miguel, Concepcion, Lambunao, Zarraga, Janiuay, Batad, Oton kag Mina.
Ginbuligan sang Provincial Veterinary Office (PVO) ang mga kabanwahanan sa pagpamakal sang mga baboy.
Lakip sa mga munisipalidad nga nagsugod pamakal sang 176 ka mga baboy amo ang Barotac Viejo, Sta. Barbara kag San Miguel.
Suno sa impormasyon sang PVO, yari ang masunod nga mga kantidad ginpanghatag sa mga kabanwahanan- Barotac Viejo – P324,000; New Lucena – P528,000; Dingle – P432,000; Banate – P2,268,000; Sta. Barbara – P432,000; San Miguel – P 300,000; Concepcion – P240,000; Lambunao – P600,000; Zarraga – P360,000; Janiuay – P1,200,000; Batad – Ph960,000; Oton – P1,896,000;kag Mina P60,000.
Para kay Provincial Veterinarian Dr. Darrel Tabuada, ang pagpanghatag sang mga baboy ang magapadugang sang imbentaryo sang baboy kag magasugod sang pagtipon sang panong sa probinsya kasunod sang resulta sang ASF.
Ginpahayag ni Dr. Tabuada nga wala sang aktibo nga kaso sang ASF sa probinsya, apang ang PVO ang nangin alerto tungod sa live shipments gikan sa Bohol, Cebu, Negros Occidental and Palawan.
May yara na sang 80,310 heads ang swine inventory sang probinsya as of Pebrero 3, 2025. Ini ang mas mataas sang 11.05% kompara sa inventory nga 72,320 sang nagligad nga month inventory.
Ginalauman man ang pagtaas sang swine inventory kasubong sang pagsugod sang piglet distribution sa mga kabanwahanan.
Nagpasalig naman ang lokal nga panguluhan sang probinsya nga magahatag sang dugang nga pundo para sa ASF Recovery Program. (AAL/LMLE/PIA Iloilo)
