Mga benepisyaryo it PAFFF halin sa Eastern side it Aklan, nagtambong sa ABL Sports Complex, Kalibo para personal nga batunon ro bulig pinansyal nga halin sa Office of the President. (PIA-Aklan)
KALIBO, Aklan (PIA) — Mga 4,827 ka mga mangunguma, mangingisda, ag mga pamilya nga eagko nga naapektuhan it El Niño phenomenon sa probinsya it Aklan ro nakabaton it pinansyal nga bulig sa Office of the President.
Sa idaeum it Presidential Assistance to Farmers, Fisherfolk, and Families (PAFFF) nga programa, ro bulig pinansyal hay gintao sa mga benepisyaryong Akeanon sa sueod it ap-at nga adlaw nga pagpanupod nga ginmanehar it Probinsyal nga Panggobyerno it Aklan. Nakabaton it P10,000 ro kada benepisyaryo.
Ro nasambit nga bulig hay kaparte it P50 milyon nga pondo nga gintao sa probinsya it Aklan nga kung siin personal nga ginbaton ni Aklan Gov. Jose Enrique Miraflores ku pagbisita ni Presidente Ferdinand Marcos, Jr. sa Antique ku Hunyo 27, 2024.
Natabo ro una nga batch it pagpanupod ku Hulyo 30, 2024 alas 9:00 it agahon sa ABL Sports Complex, Kalibo, Aklan. May kabilugan nga 1,048 nga mga benepisyaryo halin sa una nga distrito it Aklan, partikular halin sa mga munisipalidad it Banga, Kalibo, Madalag, ag New Washington ro nakabaton it PAFFF.
Sa hapon mat-a it Hulyo 30, ginhiwat sa Aklan Sports Complex sa Calangcang, Makato ro pagpanagtag it PAFFF sa ikaywa nga distrito it Akean para sa mga kabanwahanan it Buruanga, Ibajay, Lezo, Malinao, Nabas, Numancia, ag Tangalan. Mga 1,445 ka mga mangunguma, mangingisda, ag pamilya ro nakabaton it bulig pinansyal.
Ro ikatlo nga batch it pagpanagtag it bulig halin sa Opisina it Presidente hay ginpatigayon sa Villa Socorro Bypass Road sa banwa it Altavas, nga kung siin 1,485 ro mga recipient halin sa nabilin nga mga banwa sa nasidlangan nga parte it Aklan, partikular sa Altavas ag Batan.
Ro 849 nga mga mangunguma ag mangingisda halin sa Makato hay nakabaton it PAFFF sa ika-ap-at nga pay-out nga ginhiwat sa ABL Sports Complex ku Agosto 15.
Si Gov. Miraflores nga personal nga gintambong ag ginpangunahan ro pagpanupod it PAFFF sa Aklan, hay nagpaabot it pagpasaeamat kay Presidente Marcos sa bulig nga gintao sa probinsya.
“Palakpakan gid naton si Presidente Bongbong Marcos ag pasaeamatan gid naton imaw it mabaskog. Sa akon nga pagkatanda, matsa imaw pa eang ro Presidente nga nagpanao it makara kabahoe nga kwarta sa mga farmers naton,” hambae ni Miraflores sa ginhiwat nga distribusyon it PAFFF.
Ginpasaematan man nana ro Department of Agriculture ag ro Department of Social Welfare and Development sa pagpaninguha it nasambit nga mga ahensya nga nangin isaea sa mga nakabaton it PAFFF ro Aklan.
Sa tyempo it pagpanagtag it bulig, ginpadumdom man ni Miraflores sa mga benepisyaryo ro instraksyon it Presidente nga kung papaano gastuhon ro bulig nga gintao kanda.
“Para sa mga recipients naton, hay dapat man nga gastuson ninyo ra para man maibalik ro inyo nga mga naduea or nadamage nga mga produkto,” pahanumdom ni Miraflores.
Samtang, ginakabig mat-a ni Limpy L. Nadua, 71-anyos nga mangunguma nga taga Alaminos, Madalag nga sangka blessing ro PAFFF.
“Salamat gid ah sa Diyos ag kay PBBM hay may blessing nga nag-abot. May pambakae eon ako it abono ag bayad sa pagpasapsap sa eanas,” hambae ni Nadua, ag ana man nga ginapangamuyo nga uwa eon it kalamidad nga matabo sa nasyon.
Isaea ka mangingisda mat-a halin sa Guinbaliwan, New Washington, nga si Jimmy M. Bartolo ro nagpabutyag it eagko nga pagpasaeamat sa Presidente sa pagtao kana it tsansa nga makatindog halin sa ana nga mga kaperdihan.
“Mabahoe gid a akon nga pasaeamat sa Presidente dahil gintaw-an nana kami it kapital. Tungod sa hara nga bulig, makaumpisa euman kami sa pagbakae it semilya it bangus para makakita kami sa amon nga fishpond,” pagpaathag ni Bartolo.
Suno sa Office of the Provincial Agriculturist, isaea ka separado nga petsa ro anda nga igataeana para sa pagtao it ayuda para sa mga nagtaliwan nga mga benepisyaryo. Ro mga dugang nga mga dokumento nga kinahang-ean nga isumite hay igapahisayod sa mga pamilya ag igbata it namatay. (AGP/SQP/PIA Aklan)
