SYUDAD SANG ILOILO (PIA) — Magabaton ang pampubliko nga mga buluthuan kag learning hubs sa probinsya sang Guimaras sang Smart TV sets kabahin sang inisyatibo sang gobyerno probinsyal tuhoy sa pagsakdag sang edukasyon kag pag-angot sang digital divide para sa mga estudyante.
Sa ginhiwat nga Provincial School Board (PSB) meeting, ginhatagan pagtamod ni Gov. JC Rahman Nava ang importansya sang pag-adoptar sang mga makabag-o nga pamaagi sa paghatag solusyon sa mga hangkat nga ginaatubang sang mga estudyante kag mga manunudlo sa nagabag-o nga talan-awon sang sistema sang edukasyon.
Pagapangunahan sang PSB kaupod ang Department of Education-Guimaras ang pagpanatag sang mga 98 ka Smart TV sets.
“The devices will support blended learning approach in Grade 3 classes by enabling access to multimedia learning materials, online resources, and virtual instruction sessions, making lessons more engaging and accessible for students,” suno sa press release sang Guimaras Public Information Office.
Ang inisyatibo isa ka sabat sa nagadamo nga kinahanglanon para sa mga digital learning tools samtang ang mga eskwelahan naga-integrate sang hybrid kag blended learning modalities.
Pinaagi man sini, tinutuyo sang gobyerno probinsyal nga ma-empower ang mga manunudlo sa paghatag sang interactive nga leksyon kag paghanas sang abilidad sang mga kabataan nga isa man sa mga prayoridad sang administrasyon ni Gov. Nava. (AAL/LMLE/PIA Iloilo/Guimaras PIO)
