SAN JOSE, Antique (PIA) — Gintukod sa banwa kang Hamtic sa dya nga probinsya ang grupo kang mga barangay information officer (BIO) nga tuyo pasanyugon ang pagdara kang pampubliko nga impormasyon sa mga komunidad.
Angot di, naghiwat ang Philippine Information Agency (PIA) Regional Office 6 kag Local Government Unit (LGU) kang Hamtic kang duha ka adlaw nga Public Information Dissemination Training kang nagligad nga bulan kang Hulyo.
Ang paghanas, nga gintambungan kang kapin 45 ka mga barangay information officers, may katuyuan nga pasangkaron ang kinaaram kag abilidad kang mga opisyal kang barangay sa pagpaintindi kang mga programa, serbisyo kag polisiya kang gobyerno.
Gintugruan kang hugot nga igtalopangod sa nasambit nga aktibidad ang mga tikang sa pagpalab-ot sa publiko kang impormasyon tuhoy sa disaster risk reduction and management (DRRM).
Ginpangunahan ni PIA Antique Manager Pilar Mabaquiao ang paghanas paagi sa pagtudlo kang mga konsepto kang development communication, kag ni PIA-6 information officer Franz Remar Garion nga gin-eksplikar ang DRRM reporting kag social media management.
Hambal ni Garion, importante ang papel kang BIOs sa anda tagsa ka komunidad kay sanda ang tagahatod kang matuod kag mapinuslanon nga pampubliko nga impormasyon para sa anda mga kabarangay.
Samtang, nagtuon man ang barangay information officers kang media relations paagi kay PIA Antique information officer Bernard Ceasar Susbilla.
Pagkatapos kang paghanas, nanumpa ang mga barangay information officers sa andang katungdanan kag nagpili kang andang opisyales. (AGP/BPS/PIA Antique)
