SYUDAD SANG ILOILO (PIA) — Nabaton sang probinsya sang Guimaras pinaagi sa iya sini Provincial Disaster Risk Reduction and Management Office (PDRRMO) ang Gawad KALASAG (Kalamidad at Sakuna Labanan Sariling Galing ang Kaligtasan) award, isa ka pagkilala nga nagapasidungog sang dalayawon nga hinimuan sa disaster preparedness, risk reduction kag community resilience.
Ginbaton ni Teresita Siason nga Local Disaster Risk Reduction and Management Officer kag nagtiglawas sa gobyerno probinsyal sang Guimaras ang award sa tion sang 24th Gawad KALASAG Awarding Ceremony nga ginhiwat sang Disyembre 11, 2024 sa Diversion 21 Hotel, Mandurriao, Iloilo City.
Ginhingadlan ang probinsya nga Fully Compliant nga nagasunod sa standards sa pagtukod kag functionality sang DRRMOs santo sa gina-prescribed sang Philippines Disaster Risk Reduction Management Act of 2010.
Magluwas sa probinsya, ang lima ka mga Municipal Disaster Risk Reduction and Management Office ang nakabaton man sang Gawad KALASAG seal bilang Fully Compliant.
Ang Gawad KALASAG Award amo ang pinakamataas nga pagkilala para sa disaster risk reduction and management sa pungsod nga nagaselebrar sang dalayawon nga mga pagpanikasog sang lokal nga panguluhan, non-government organizations kag iban pa nga tagsakdag sa pagtukod sang hilway kag disaster-resilient nga mga komunidad. (AAL/LAF/PIA6-Iloilo/Guimaras-PIO)
