SYUDAD SANG ILOILO (PIA) — Naglab-ot sa P3 million ang insentibo nga nabaton sang gobyerno probinsyal sang Guimaras bilang padya sa pagdaog sang Seal of Good Local Governance (SGLG) award nga ginhiwat sang Department of Interior and Local Government (DILG).
Ginpahayag ni Guimaras Gov. JC Rahman Nava nga ang padya nagapakita lamang sang tayuyon nga pagsunod sang probinsya tuhoy sa national standards para sa transparency, accountability, kag service delivery.
Pagagamiton ang ini nga kantidad sa pagpondo sang mga proyekto nga magapasanyog sang serbisyo publiko kaangay sang mga rescue vehicles nga magasuporta sang paghanda batok sa kalamidad kag response capabilities sang gobyerno probinsyal.
Ginpabugal man ni Gov. Nava ang mga kadalag-an sang probinsya kag ang pagpanikasog kag pagbinuligay sang tagsa tagsa.
Liwat nga ginpat-od sang gobernador ang pangako sang gobyerno probinsyal angot sa pagamit sang pondo sing responsable para sa mga proyekto nga direkta nga makabenepisyo sa komonidad. (AAL/LMLE/PIA Iloilo)
