SYUDAD SANG ILOILO (PIA) –Naagom sang probinsya sang Guimaras ang second class status sa bahin sang income classification sugod Enero 1, 2025, kun sa diin naglab-ot sa P1,108,335,869.33 ang average nga tuigan nga regular income sang probinsya.
Suno sa gobyerno probinsyal, ang ini nga development ginalauman nga magahatag sang mga kahigayonan sa mga proyekto, programa, kag iban pa nga mga sahi sang bulig para sa probinsya lakip man ang pag-adjust sang sweldo para sa mga katapo sang lokal nga gobyerno.
Nagikan sa fourth class nga probinsya, nakaagom ang Guimaras sang pagtaas sa tuigan nga regular income humalin 2021, 2022, kag 2023.
Ginakabig naman sang Department of Finance (DOF) ang pag-classify sa mga second class provinces nga kutob sa naga-ganar sang average annual regular income nga P900,000,000.00 ukon kapin pa, apang mas manubo sa P1,500,000,000.00.
Sa pihak nga bahin, nagsaka man ang income classification sang lima ka mga kabanwahanan sang probinsya kun sa diin ang Buenavista nangin first class status na.
Ang mga kabanwahanan sang Jordan kag Nueva Valencia nagsaka sa second class category gikan sa third class.
Yara naman sa third class category ang San Lorenzo humalin sa fifth class municipality kag ang banwa sang Sibunag ang nangin third class gikan sa fourth class. (AAL/LMLE/PIA Iloilo)
