SAN JOSE Antique (PIA) — Nagpasalamat kay Presidente Ferdinand Marcos Jr. ang mga mangunguma sa probinsya sa anda nabaton nga kapin P33 milyones nga balor kang proyekto, makinarya, kag kagamitan.
Sa ginhiwat nga “Handog ng Pangulo: Serbisyong Tapat para sa Lahat” kang nagligad nga bulan, sa pagselebrar kang kaadlawan kang Presidente, ang mga opisyales halin sa Department of Agriculture (DA) kaimaw si Governor Rhodora Cadiao ginpangunahan ang turnover kang mga bulig para sa mga mangunguma.
Sara sa mga benepisyaryo ang Kalipunan ng Magsasaka sa Patnongon (KAMAPAT) Agriculture Cooperative nga nakabaton kang corn combine harvester unit nga naga-balor masobra P2 ka milyon.
Hambal ni KAMAPAT Vice President Tranquilino Pillado Jr., bahol gid ang bulig kang corn combine harvester sa pagpamayad kang andang ani sa uma.
Dugang na pa, ang dyang mga teknolohiya may bahol nga kontribusyon sa pagpataas kang andang kapasidad sa pagpanguma, pagpanaba kang gastos sa produksyon, kag pagpadasig kang ani kumpara sa tradisyonal ukon mano-mano nga pamaagi.
Bahul ang pagpasalamat ni Pillado kay Presidente Marcos para sa pag-atipan sa mga mangunguma parehas kana nga bahul gid and nabuol nga benepisyo halin sa mga programa kang gobyerno sa sektor kang agrikultura.
Sara pa sa mga benepisyaryo amo ang Sibalom Mango Growers Association (SMGA) nga nakabaton kang lima ka unit nga electric power sprayers halin sa DA.
Hambal ni SMGA President Mansueto Marquez, ang kagamitan nga andang nabaton bahul ang bulig sa epektibo nga pagbutang kang pesticides sa anda mga puno ka mangga.
Magluwas sa mga makinarya kag kagamitan, dugang hambal ni Marquez nga bahul man ang mangin bulig sa mga mangunguma kung sanda makabaton kang dugang nga kapital kag bulig sa marketing.
Samtang, iba pa nga mga makinarya kag kagamitan sa pagpanguma nga ginpangtagtag sa ginhiwat nga Handog ng Pangulo: Serbisyong Tapat Para sa Lahat amo ang mini-chainsaws, plastic crates, recirculating dryer, soil ameliorants, hybrid rice seeds, kag hand tractor.
Sa piyak nga bahin, pira sa mga proyekto agrikultural nga gin-turnover amo ang goat multiplier farms kag forage cuttings kag binhi para sa forage kag pasture development kang San Jose Multi-Purpose Cooperative kag Nasuli, Iba, Casay, San Francisco (NICS) Multi-purpose Cooperative.
Sa anang parte, si Gov. Cadiao nagpasalamat kay Presidente Marcos para sa anang dedikasyon nga masiguro ang padayun nga pag-abot kang suporta kag bulig sa probinsya agud mapamayad ang kabuhi kang mga Antiqueño. (AGP/YPA/BPS/PIA Antique)
