NABUNTURAN, Davao de Oro (PIA) — Sa kasaulogan sa ika 66 nga Araw ng Nabunturan, dili lamang mga pasundayag ug kompetisyon ang nahimong kalihukan, nagpahigayon usab og malampusong Serbisyo Uban sa Gugma (Social Services) ang Lokal nga Panggamhanan sa Nabunturan sa pag pangulo ni Mayor Myrocel Clarin Balili.
Sa unang adlaw sa selebrasyon niadtong Hulyo 21, ang Municipal Health Office sa panguna ni Dr. Danielo O. Rubillos, MHO, nagpahitabo ug Free Medical, Dental, ug Optical Services, kung diin dul-an 500 ka mga Nabunturanon ang nakapahimulos sa maong mga serbisyo. Mihatag usab og libreng eye check up, lakip na reading glasses ug eye drops ang mga Opthalmologist nga ka pamilya ni Mayor Myrocel Balili nga sila Dr. Ma. Viola Clarin, Dr. Ma. Sophia Clarin, ug Glenn Clarin.
Sa samang adlaw, nagpahigayon usab og Job Fair pinaagi sa Human Resources Section, alang sa mga Nabunturanon nga nag kinahanglan og trabaho.
Gatusan usab ang mga nanghinaut nga makakaplag ug panarbahoan sa maong serbisyo.
Sa ikaduhang adlaw, nagpahitabo ang Mayor’s Office og Beauty Care, Health and Wellness kung diin ubay-ubay usab ang mga residente nga naka avail sa libreng manicure, pedicure, gupit sa buhok ug masahe gikan sa mga personahe nga nipaubos sa hustong pagbansay nga gihatag sa TESDA, sa pakig-alayon sa LGU Nabunturan.
Sa ulahing adlaw sa Serbisyo Uban sa Gugma (Social Services), nag apod-apod ang mga personahe sa MAGRO og libreng semilya sa nagkadaiyang klase sa gulay ug lagutmon, ug pipila ka piso sa manok ngadto sa mga maswerteng Nabunturanon. Nagpahigayon usab sila og libreng bakuna batok sa anti-rabies sa mga alagang hayop sama sa iro ug iring.
Ang tulo (3) ka adlaw nga libreng mga nagkadaiyang serbisyo, dakong tabang sa mga residente sa Lungsod, ug naghatag usab ug dakong kalipay hilabina sa mga ka igsoonang Nabunturanon nga lisod ang kahimtang sa kinabuhi. (PIA/ PR-LGU Nabunturan)
