CAMIGUIN (PIA) — Ang mga botante sa Camiguin mitaho og kasinatian nga malinawon ug hapsay atol sa 2025 National and Local Elections, diin ang mga senior citizen, persons with disabilities (PWDs), ug uban pang mga prayoridad nga sektor nakadawat og tukmang tabang samtang ang mga lokal nga otoridad misiguro sa kaluwasan ug kahapsay sa tanang presinto.
Gipadayag sa mga senior citizen nga botante ang ilang pagpasalamat sa maayong organisasyon sa proseso sa pagbotar. Usa ka senior citizen miingon, “Wala ko’y problema aning precinct kay wala ra nag-one hour nakabotar nako basta dali ra gyud. Systematic gyud amo dinhi. No problem sa mga senior.”
Gipasiugda usab niya nga ang mga senior citizen gihatagan gyud og prayoridad ug panahon sa pagbotar.
Ang mga PWD botante usab nakadawat og hapsay nga serbisyo. Usa kanila miingon, “Dali ra ang pamaagi kay ako mang gi-inform nga PWD so na-assist mi, dali ra gyud kaayo.”
Ang mga lokal nga ahensya sa kagamhanan, lakip na ang Philippine National Police (PNP) sa Camiguin, Disaster Risk Reduction and Management Offices (DRRMO), mga rural health units (RHUs), ug uban pang mga law enforcement agencies misiguro sa kahapsay ug kaluwasan sa eleksyon pinaagi sa pagpakusog sa ilang presensya sa mga presinto.
Ang mga medical team usab giandam aron motabang dayon sa mga botanteng nanginahanglan og tabang medikal.
Gisaysay usab ni Jessica Mae Del Puerto, usa ka botante gikan sa Mambajao, ang kasinatian isip usa ka lactating mother nga botante. Bisan pa nga wala dayon hatagi og prayoridad ang mga inahan nga sama kaniya, nakalabang gihapon siya sa fast lane pagkahuman sa senior ug mabdos nga mga botante.
“By 9:00 a.m., nahurot na ang mga senior citizen og pag-voting and then pregnant woman, gipanguha na dayon mi and gitagaan mi og privilege nga maadto sa fast lane,” ingon ni Del Puerto.
Nahuman siya sa pagboto mga alas 10:45 sa buntag, apan nanghinaot nga sa sunod nga eleksyon hatagan og kaugalingong linya ang mga lactating mothers ug kadtong nagdala og bata.
Samtang, ang laing botante nga si Vilma Gabales nagpasabot sa mas maayo nga dagan sa eleksyon karon kumpara sa miaging tuig. “Mas dali karon kaysa niagi kay hapsay karon… Dali ra pud nahuman ang amo nga precinct cluster,” iyang gibutyag.
Aron masuportahan ang eleksyon, ang Department of Education Division sa Camiguin mipadagan sa ilang Election Task Force (ETF) sugod Mayo 11 hangtod Mayo 13, aron motabang sa mga DepEd personnel. Ang ETF nagtutok sa pagdali og tubag sa mga kabalaka ug pagpanginahanglan sa mga personnel, subay sa panawagan sa DepEd alang sa usa ka “MakaBAGONG Halalan para sa Makabagong Pilipino.”
Ang mga personnel sa DepEd nga nanginahanglan og tabang gidasig nga motawag sa mga hotline o magpadala og email, aron mahatagan dayon og suporta. Ang ETF nagtumong sa integridad, transparency, ug proteksyon alang sa mga magtutudlo ug kawani nga nagserbisyo atol sa eleksyon.
Ang positibong kasinatian sa kadaghanan sa mga botante nagpakita sa kalampusan sa probinsya sa pagpasiugda og inklusibo ug hapsay nga eleksyon, apan nagbilin usab og mga leksyon alang sa mas maayong proseso sa umaabot nga eleksyon. (RTP/PIA-10/Camiguin)
