Si PDRRMO Broderick Train nagpaathag kang preparasyon ka mga ahensya sa idalom kang PDRRMC tuhoy sa gina-eksperyensyahan nga tag-irinit kang ginhiwat ang pulong-balitaan kaimaw ang mga lokal nga mamamahayag sa Antique. (Litrato: PIA Antique)
SAN JOSE, Antique (PIA) — Ang Antique Integrated Provincial Health Office (IPHO) nagaduso kang padayon nga pagpanglimpyo agud malikawan ang mga lamok nga nagadara kang dengue.
Ginpamaan kang PHO nga nagapadayon ang pagsaka kang kaso ka dengue kadya nga Abril 2025.
Dya ginpaathag ni PHO information officer Irene Duldoco kang ginhiwat ang pulong balitaan nga gin-organisar kang Philippine Information Agency (PIA) kaimaw ang Provincial Disaster Risk Reduction and management Council (PDRRMC).
Suno kay Duldoco ang pinakaurihi nanda nga report may kabilogan run nga 1,188 nga kaso kang dengue kag may tatlo nga napatay, kadya lang nga tuig.
Ang mga hospital sa Antique nag-activate run ka anda dengue fast lanes para madali marespondehan ang mga pasyente nga na-dengue.
Ginapangabay gid ka PHO ang pagsunod sa 5S strategy agud mabatuan ang dya nga sakit.
Pagpanglimpyo, pag-agto sa otoridad sa ikaayong lawas samtang temprano, pagsuksuk kang panapton agud indi makagat ka lamok, pagpangspray sa mga lugar nga raku gid ang kiti-kiti kon kinahanglanon, kag pagsustain sang hydration. (AGP/PSM/PIA Antique kaimaw ang mga balita halin kay VGT/DOLE Intern)
