TAGBILARAN CITY, Bohol, Nov 14 (PIA) — Kap-atan ug upat ka mga exhibitors ang nagdala sa ilang mga mugna nga gitagana alang sa mga Bol-anong panimalay sa Pasko, ngadto sa Holiday Market and Crafts Fair nga gibuksan Nobyembre 14 ngadto na sa 18, diha sa Activity Center sa Island City Mall.
Ang exhibit sa mga gamit ug dayandayan para sa Pasko, ang Crafts Fair mao nay ika tulo nga hugna sa tinuig nga pagtumod sa nga produktong mugna sa mga gibantug nga crafts makers sa rehiyon.
Tanyag sa Department of Trade and Industry ug sa Alturas Group of Companies aron maghatag sa mga Bol-anong gagmay nga mamumuhunan sa higayon nga makaugmad og merkado alang sa ilang mga mugna, ang Holiday Market ug Crafts Fair karon naglakip sa mga produktong furniture, novelty items ug mga wearables, Christmas decors ug giproseo nga pagkaon.
Karong tuiga, gikalipay sa DTI nga nagkadaku, nagkadaghan ang exhibitors ug unta magkadaku usab ang halin nga madala sa atong mga mamumuhunan nga gitabangan, matud ni Vierna Teresa Ligan, officer-in-charge sa DTI.
Gipasalig usab sa ahensya nga ang mga ming-apil sa exhibit, mi-agi sa makuti nga pagtudlo sa product development ug design sa DTI.
Sa 45 hinuon ka exhibitors, may mga nasagol dinhi nga mga taga Sugbo, dugang ni Ligan, kinsa nagpadayag usab sa kasibut sa ilang ahensya nga motabang aron dili lamang pagpahimutang sa mamalitay sa mga produkto kon dili aron ikapadayag usab sa mga Bol-anong tigmugna, ang ilang mga produkto nga himo sa ilang kamaayong artisans.
Butyag usab sa DTI nga aron mahimong mas inclusive ang Fair, anaa dinhi mapalit ang mga dayandayan nga bituon nga gisug-an, mga bags nga recycled, mga pahiran sa balay, mga dekorasyon sa pasko ug mga paintings nga mugna sa mga priso sa Bohol Detention and Rehabilitation Center.
Gitapok usab didto kadtong mga Micro, Small ug Medium Enterprises nga gitabangan sa Technical Education and Skills Development Authority, Department of Agriculture, Department of Agrarian Reform ug sa Department of Science and Technology.
Si Mayor Jane Yap, mipadayag usab nga matag higayon nga magbukas og mga Products Fairs, dili gyud kini niya sipyaton tungod kay aduna gyud siyay makit-an nga bag-o nga kinahanglan nga iyang mapalit.
Ang fair nga nagsaulog usab sa local nga mga artisans ug mga kultura ug kinaiya, nga nagduso ug nagpa-abante sa paggahum sa mga katawhan alang sa malungtarong kaugmaran.
Sa ngalan ni Gob Erico Aristotle Aumentado, si Provincial Legal Officer Atty. Handel Lagunay mi-sulti nga ang exhibits usa ka kaigayunan sa mga Bol-anong may talagsaong abilidad nga makamahuhunan samtang paningkamotan sa Kapitolyo nga ikapahiluna ang usa ka environment mga magpalipang sa Negosyo subay sa strategic change agenda sa kagamhanan. (RAHC/PIA Bohol)
TABO SA ARTISANS. Ang bag-ong gibuksan nga Holiday Market ug Crafts Fair nga gi-organisa sa DTI Bohol ug sa Alturas Group of Companies maoy ikatulo na nga Fair alang sa mga dayandayan sa Pasko ug mga gasa alang sa Pasko nga mugna sa mga labing batid nga manghimoay sa furniture, mga novelty items ug mga wearables lakip na ang processed food. (PIA Bohol)
