TAGBILARAN CITY, Bohol (PIA) — Hugot bakos, kini maoy personal nga tambag ni Philippine Statistics Authority (PSA) Bohol statistician Jessamyne Anne Alcazaren, atul sa binuwan niining Inflation Press Conference didto sa buhatan niini sa Galeria Luisa, ning syudad.
Kini samtang ang padayon pa ang pagsaka sa inflation sa buwan sa Hunyo, diin ang P100 niadtong 2018, nagkantidad na karon og P123.10, o ang kanhi P1.00, katumbas na lamang sa P.81 sentabos.
Gikan sa 5.1 porsyento niadtong Mayo, 2024, nisaka pa gyud ngadto sa 5.2 porsyento ang presyo sa mga pangunsumo sa buwan sa Hunyo, taho ni Alcazaren.
Ang pagsaka sa kinatibuk-an nga inflation sa Hunyo 2024, gitulak sa taas nga tinuig nga pagsaka sa abangan sa mga balay ug presyo sa pagpatukod og balay, bayranan sa tubig, koryente, gas ug uban pang igsusugnod nga mingtala sa 2.8 porsyento gikan ss 1.5 porsyento sa Mayo 2024.
Kini gipun-an pa sa pagsibog sa tinuig nga presyo sa panakyanan ug pletehan gikan sa 2.6 porsyento sa Mayo ngadto na sa 3.2 porsyento.
Luyo niining tanan, dako og gikatampo ang pagsibog sa presyo sa mga pagkaon ug ilimnong dili makahubog, gawas sa nga factors nga nagtulak-pasulbong sa inflation.
Ang presyo sa bugas, padayon pang nagsaka gikan sa 22.2 porsyento nagdto na sa 24.7 porsyento, mga prutas ug nits nga anaa na sa 10.1 porsyento gikan sa 9.5 porsyento, utanon ug lagutmon , saging ug mga monggos gikan sa 5.8 ngadto na sa 6.7 porsyento.
Segun sa PSA, sa kasamtangan nga gasto sa pagkaon nga naa sa 53 porsyento sa kinatibuk-ang kita sa panimalay, sa presyo sa pagkaon karon, gikinahanglan na ang paghimo og mga adjustments sa pami;ya aron mabahin og sakto nga walay gutomon, dayag
sa PSA.
Lisud pa ang panahon, gikinahanglan na tingali nga pahugtan pa ang mga bakus, dayag ni Alcazaren, aron mainat pa ang mga kahinguhaan ngadto sa tulo pa ka buwan.
Sa mga anaa sa mga bukid nga nagsalig sa ilang pananum aron maog himoong tinubdan sa pagkaon, ang taas nga lanat sa huwaw, nagpalisud usab sa pagseguro sa suplay sa pagkaon.
Ug sanglit, human sa mga paningkamot nga ipabundak ang tinuyo nga uwan pinaagi sa cloud seeding, may mga lugar na sa Bohol nga nakatanum, matud sa National Irrigation Authority, mahimong moabut na sa buwan sa Mayo nga maka-apas pa ang kadaghanan sa pagpananum.
Ang humay, molanat pa og tulo ka buwan gikan sa pagtagud ngadto sa pag-abis, aron pwede na nga kaonon.
Niini, laing tulo pa ka buwan ang labangon sa mga Bol-anong kabus sa pagkaon, aron kon makalahutay, ikapabalik na usab ang regular nga suplay sa pagkaon. (RAHC/PIA Bohol)
